Міністр сельскай гаспадаркі: Санкцыі санкцыямі, а есці хочацца ўсім, заўсёды і смачна
17 лістапада, Позірк. Аб дасягненнях беларускіх аграрыяў ва ўмовах міжнародных санкцый справаздачыўся ў інтэрв’ю “Сельскай газеце” міністр сельскай гаспадаркі і харчавання Анатоль Ліневіч.
Паводле яго слоў, у айчынных “земляробаў назапашаны свой вялікі досвед вырашэння любых праблем”. “І каб яго пазычаць, сёння не трэба ехаць за тры моры. Хоць у свой час мы настойліва і скрупулёзна вывучалі еўрапейскі вопыт у земляробстве, садаводстве, жывёлагадоўлі і атрымалі поспех у гэтым. Настолькі, што ўжо некаторыя замежныя калегі не супраць зазірнуць на нашы палі, фермы, перапрацоўчыя прадпрыемствы, каб падгледзець сакрэты”, — сказаў Ліневіч.
“Санкцыі санкцыямі, а есці хочацца ўсім, заўсёды і смачна”, — заявіў чыноўнік.
Ён паведаміў, што фінансавы год галіна скончыць “са станоўчым вынікам”.
“Забяспечаны рост выручкі ад рэалізацыі прадукцыі (за восем месяцаў выручка павялічылася на 11,2% да адпаведнага перыяду мінулага года), атрыманы прыбытак ад рэалізацыі і станоўчая рэнтабельнасць продажаў (больш за 6%), чысты прыбытак павялічаны да адпаведнага перыяду 2023-га на 1,6%”, — адзначыў кіраўнік ведамства.
Санкцыі не перашкодзілі Беларусі атрымаць статус “аднаго з вядучых экспарцёраў харчавання ў свеце”, сцвярджае міністр.
“Доля харчовых тавараў і сельгассыравіны ў агульнай структуры нашага экспарту — больш за 20%. Гэта добра, але далёка не мяжа! І мы не збіраемся спыняцца на дасягнутым. Кіраўніком дзяржавы на гэты год пастаўлена амбіцыйная задача: экспарт харчовых тавараў і сельгассыравіны арыентаваць на 9 млрд долараў. Па сілах нам такая вышыня? Цалкам. Для гэтага планамерна нарошчваем аб’ёмы, пашыраем як геаграфію паставак, так і прысутнасць беларускіх тавараў на ўжо асвоеных рынках. Нагадаю: сёння беларускае харчаванне пастаўляецца ў больш чым 100 краін свету”, — сказаў Ліневіч.
Каля 60% “экспартнага кошыка” беларускай сельскай гаспадаркі складае, паводле яго слоў, “малочная і мясная прадукцыя”. “Але што цікава, — дадаў чыноўнік, — растуць пастаўкі прадукцыі раслінаводства: свежай гародніны, ягад і садавіны, перапрацаванай плодаагародніннай прадукцыі, а таксама рыбы і рыбнай прадукцыі”.
“Асноўны аб’ём” экспартных паставак “прыпадае на традыцыйныя рынкі <…> краін СНД, перш за ўсё ў Расійскую Федэрацыю”, паведаміў ён.
“Але нават пры такіх знешніх рынках у шапку спаць не варта і трэба шукаць збыт у далёкім замежжы. Тут самавітыя аб’ёмы экспарту ўжо прыпадаюць на краіны Азіі. Зразумелая справа, Кітай — наш найважнейшы стратэгічны партнёр у Азіі. Максімальна актыўна замацоўваемся на гэтым рынку. І не толькі пастаўкамі харчавання, але і рэалізацыяй сумесных праектаў з кітайскімі партнёрамі, у тым ліку ў стварэнні сумесных прадпрыемстваў па вытворчасці малочных прадуктаў з беларускай сыравіны ў Кітаі”, — заявіў Ліневіч.
Паводле яго сцвярджэння, расце экспарт у краіны Афрыкі і Лацінскай Амерыкі. “Вельмі ўжо вялікі патэнцыял рынкаў афрыканскіх краін для беларускіх тавараў. Развіццю гэтага кірунку надаецца асаблівая ўвага, ёсць канкрэтныя вынікі. Пачаты пастаўкі сухіх малочных прадуктаў у Алжыр. Гэта другі ў свеце імпарцёр па гэтым напрамку пасля Кітая, і яго рынак вельмі перспектыўны і ёмісты для экспарту сухога малака. У Рэспубліку Зімбабвэ пастаўлена першая пробная партыя сухога абястлушчанага малака”, — адзначыў кіраўнік Мінсельгасхарча.
Лукашэнка пра сельскую гаспадарку ў Віцебскай вобласці: Культура земляробства нізкая, зябліва не падымаецца, страты каласальныя
8 лістапада, Позірк. Сітуацыю ў сельскай гаспадарцы Віцебскай вобласці раскрытыкаваў Аляксандр Лукашэнка 8 лістапада на фестывалі-кірмашы "Дажынкі-2024" у Полацку. "Што будзем рабіць з Віцебскай вобласцю або ў Віцебскай вобласці? — цытуе Лукашэнку яго прэс-служба. — Я вас (чыноўнікаў. — "Позірк".) …