Лукашэнка пра сельскую гаспадарку ў Віцебскай вобласці: Культура земляробства нізкая, зябліва не падымаецца, страты каласальныя
8 лістапада, Позірк. Сітуацыю ў сельскай гаспадарцы Віцебскай вобласці раскрытыкаваў Аляксандр Лукашэнка 8 лістапада на фестывалі-кірмашы “Дажынкі-2024” у Полацку.
“Што будзем рабіць з Віцебскай вобласцю або ў Віцебскай вобласці? — цытуе Лукашэнку яго прэс-служба. — Я вас (чыноўнікаў. — “Позірк”.) хачу папярэдзіць: у сакавіку, калі гэты прэзідэнт застанецца, вы мне да сантыметра даложыце (разам з памочнікамі, адказнымі за вобласць, губернатарам), што мы будзем рабіць з Віцебскай вобласцю. Працуе Віцебская вобласць — не для свята сказана — з рук прэч дрэнна”.
Працу аграрыяў у рэгіёне рускамоўны прамоўца ахарактарызаваў па-беларуску — “абы з рук”, удакладніўшы, што так кажуць “у вёсцы”.
“Людзі павінны тут жыць і працаваць. Яны тут павінны знайсці сваё месца і сваю заработную плату. Няма парадку, няма дысцыпліны, няма адказнасці. Жудасць. З усім трэба вызначацца: якое поле, якая кармавая база для фермы або комплексу. Але ўмовы павінны быць для людзей на гэтым комплексе або на ферме добрымі”, — заявіў Лукашэнка.
Ён перасцярог чыноўнікаў, каб тыя “нават не спрабавалі нешта замусоліць”. Паводле яго слоў, у вобласці “культура земляробства нізкая, зябліва не падымаецца, страты збожжавых каласальныя”.
“Нам трэба інтэнсіўная сельская гаспадарка, а не за кошт плошчаў экстэнсіўна яе весці. Пакуль бачная зямля, пакуль снегам не накрыла, аблятайце зверху, знізу, злева, справа, глядзіце і думайце, што будзем рабіць”, — дадаў Лукашэнка.
“У наступнай пяцігодцы” неабходна “канчаткова вырашыць пытанне па Віцебскай вобласці”, сказаў ён. “Вырашыць у станоўчым ключы і вызначыцца, што мы тут будзем рабіць. Нас чакае цяжкая праца. Дапамагаць будзем тым, хто дасць аддачу. Мы не можам закопваць чужыя грошы ў зямлю. Дапамога — гэта мы ў кагосьці возьмем і вам дамо. Простая формула. Узяў — аддай”, — падкрэсліў спікер.
“У цэлым паказчыкі гэтага года” ў сельскай гаспадарцы ён назваў “даволі кантраснымі”. “Ёсць асобныя раёны і прадпрыемствы, якія годна глядзяцца на ўзроўні лідараў рэспублікі. Пытанне толькі, як гэтыя поспехі зрабіць для Віцебшчыны нормай”, — адзначыў Лукашэнка.
Фестывалі-кірмашы “Дажынкі-2024” Лукашэнка наведвае гэтай восенню рэгулярна. На думку шэрагу экспертаў, гэтыя паездкі ў раёны носяць перадвыбарчы характар. Лукашэнка гэта адмаўляе.