Туск лічыць прэзідэнцкія выбары ў Беларусі адным з выклікаў у перыяд польскага старшынства ў ЕС
Дональд Туск
5 снежня, Позірк. Вайна ва Украіне, палітычная дэстабілізацыя вакол Еўропы і ў Еўропе, палітычныя крызісы ў найбуйнейшых краінах ЕС, падзеі ў Грузіі, Паўднёвай Карэі, Сірыі, сектары Газа, а таксама будучыя прэзідэнцкія выбары ў Беларусі з’яўляюцца тымі выклікамі, з якімі давядзецца сутыкнуцца Еўрасаюзу падчас польскага старшынства ў ЕС у першай палове 2025 года.
Пра гэта, паводле інфармацыі “Газеты Выборчай”, заявіў прэм’ер-міністр Польшчы Дональд Туск 5 снежня на прэс-канферэнцыі па выніках сустрэчы з прэзідэнтам Еўрапарламента Рабертай Метсола, якая наведвае Варшаву.
“Усё гэта паказвае нам, у наколькі цяжкі гістарычны момант нам давядзецца працаваць дзеля бяспекі Еўропы”, — цытуе Туска выданне.
Паводле інфармацыі газеты, прэм’ер-міністр “таксама закрануў сваю ідэю часова прыпыніць права на прытулак”, што, як мяркуе выданне, “азначала б адмову ад прыёму заяў ад людзей, якія перасякаюць польска-беларускую мяжу ў выніку дзеянняў рэжыму Лукашэнкі”.
“Я рады, што праціўнікаў думкі пра абарону межаў становіцца ўсё менш і што гэта становіцца нашым агульным мысленнем. Не ўсе ў захапленні ад польскіх ініцыятыў, напрыклад магчымасці прыпынення падачы заяў аб наданні прытулку. Гэта таксама было пацверджана на сённяшняй сустрэчы, але Польшча, безумоўна, будзе праводзіць тут жорсткую палітыку”, — заявіў Туск.
Прэзідэнцкія выбары ў Беларусі прызначаныя на 26 студзеня 2025 года.
Навіна пра тое, што ўрад Польшчы падрыхтаваў новую міграцыйную стратэгію, якая сярод іншага прадугледжвае “часовае тэрытарыяльнае прыпыненне права на прытулак”, выклікала вялікі грамадскі рэзананс.
Аднак стратэгія не закране “абсалютную большасць беларусаў”, якія “легалізаваліся або плануюць легалізавацца” ў краіне, заявіў кіраўнік Упраўлення ў справах замежнікаў Польшчы Томаш Цытрыновіч. Змены перш за ўсё будуць тычыцца тых, хто “атакуе мяжу, выкарыстоўваючы падтрымку памежнай службы Беларусі” і ўдзельнічаючы тым самым у “гібрыднай вайне Беларусі і Расіі супраць Польшчы”.