Да 2028 года падоўжаны тэрмін узаконьвання самавольна занятых зямельных участкаў

6 снежня, Позірк. Закон “Аб змяненні законаў па пытаннях дзяржаўнай рэгістрацыі нерухомай маёмасці, правоў на яе і здзелак з ёй” падпісаў 5 снежня Аляксандр Лукашэнка, паведамляе яго прэс-служба.

Сярод іншага дакумент падаўжае да 1 студзеня 2028 года тэрмін узаконьвання самавольна занятых зямельных участкаў (“зямельная амністыя”).

Законам таксама прадугледжваецца абавязковая дзяржаўная рэгістрацыя нерухомай маёмасці, правоў на яе і здзелак з ёй на працягу не больш за 6 месяцаў, а па раней выдадзеных дакументах — да 1 студзеня 2031 года.

“Грамадзяне змогуць атрымліваць пасведчання аб дзяржрэгістрацыі непасрэдна ў натарыуса, які засведчыў альбо выдаў дакумент, які з’яўляецца падставай для рэгістрацыі, без неабходнасці дадатковага наведвання рэгістратара нерухомасці”, — гаворыцца ў паведамленні.

У адпаведнасці з дакументам, у Адзіны дзяржаўны рэгістр нерухомай маёмасці ў аўтаматычным рэжыме будуць уносіцца выпраўленні, звязаныя са змяненнем адрасоў аб’ектаў нерухомасці, персанальных даных грамадзян, ідэнтыфікацыйных звестак суб’ектаў гаспадарання, а таксама з пераходам правоў на нерухомую маёмасць у выпадку стварэння індывідуальным прадпрымальнікам камерцыйнай арганізацыі.

Законам таксама прадугледжаны прынцып рэгістрацыйных дзеянняў незалежна ад месца знаходжання маёмасці, а таксама абавязковы дасудовы парадак абскарджання дзеянняў рэгістратара нерухомасці.

Да прыняцця закона “зямельная амністыя” дзейнічала з 1 верасня 2022 года па 1 верасня 2025-га.

Па стане на ліпень 2024 года ў Беларусі выяўлена 79 тыс. фактаў самавольнага заняцця часткі зямель, аднак толькі па 14% з іх зробленая спроба легалізацыі.