Лукашэнка заявіў, што зрынуты ў Сірыі Асад не быў дыктатарам, а “лячыў людзей як урач”

10 снежня, Позірк. Зрынуты ў Сірыі прэзідэнт Башар Асад — “ніякі не дыктатар”, “ён лячыў людзей як урач”, заявіў 10 снежня Аляксандр Лукашэнка падчас працоўнай паездкі ў Барысаў (Мінская вобласць).

“Які Башар Асад дыктатар? Урач па прафесіі, я яго ведаю даўно. У нас былі добрыя чалавечыя стасункі. <…>. Ён ніколі нікога не забіваў”, — цытуе Лукашэнку яго прэс-служба.

Ён адрэагаваў на тэзы пра зрынанне Асада сірыйскім народам: “Які народ? Бедныя, жабракі. Ператварылі краіну… Увогуле знішчылі”.

Паводле слоў Лукашэнкі, сітуацыя ў Сірыі абвастрылася з віны Захаду. “Трэба было зламаць, — сказаў ён. — Нафты там дастаткова, газу. Трэба аднекуль кудысьці праз Сірыю газаправод правесці на ўзбярэжжа Міжземнага мора. Усё гэта ў інтарэсах Захаду і амерыканцаў. І галоўную ролю адыгрываюць там яны”.

8 снежня стала вядома пра падзенне рэжыму Асада ў Сірыі. Маючы адукацыю афтальмолага, ён кіраваў краінай з 17 ліпеня 2000 года, замяніўшы на пасадзе прэзідэнта свайго бацьку Хафеза Асада, які прыйшоў да ўлады ў выніку ваеннага перавароту ў лістападзе 1970 года. Усяго сям’я Асадаў кіравала краінай 54 гады.

Пасля ўцёкаў з Сірыі Асад з членамі сваёй сям’і прыбыў у Расію, дзе атрымаў прытулак.

Сітуацыя ў Сірыі рэзка абвастрылася напрыканцы лістапада, калі ўзброеныя апазіцыйныя групоўкі пачалі наступленне ў правінцыях Алепа і Ідліб. Іх аснову складаюць баявікі ісламісцкай арганізацыі “Хаят Тахрыр аш-Шам”.

Войскі Асада не аказалі паўстанцам эфектыўнага супраціўлення.

Паводле ацэнак праваабаронцаў, больш за 30 тыс. сірыйскіх зняволеных былі пакараныя смерцю або памерлі ў выніку катаванняў, адсутнасці медыцынскай дапамогі або голаду ў перыяд з 2011 па 2018 год. Спасылаючыся на сведчанні некалькіх вызваленых зняволеных, праваабаронцы заяўляюць, што яшчэ 500 чалавек былі пакараныя смерцю ў перыяд з 2018 па 2021 год. Па меры прасоўвання паўстанцаў да сталіцы краіны Дамаска з турмаў былі вызвалены тысячы палітвязняў. Некаторыя правялі ў няволі некалькі дзесяцігоддзяў.

Лукашэнка няўхільна падтрымліваў Асада. 2 снежня падтрымку яму і “народу братэрскай Сірыі” у сувязі з атакі “тэрытарыяльных фарміраванняў” выказала Міністэрства замежных спраў Беларусі.

Лукашэнка знаходзіцца ва ўладзе з 1994 года. Рыхтуецца працягнуць паўнамоцтвы яшчэ на пяць гадоў на дэ-факта безальтэрнатыўных выбарах 26 студзеня 2025 года.

Папярэднія выбары 9 жніўня 2020 года адрозніваліся найбольшымі і працяглымі пратэстамі за ўсю гісторыю суверэннай Беларусі. Масавыя палітычныя рэпрэсіі, якія пачаліся ў перыяд мінулых прэзідэнцкіх выбараў 2020 года, працягваюцца да гэтага часу.

Утрымаць уладу ў 2020 годзе Лукашэнка змог дзякуючы гвалту сілавых органаў і падтрымцы Расіі.