У рамках праверкі боегатоўнасці ваеннаабавязаныя адпрацоўваюць маскіроўку баявой тэхнікі

9 сакавіка, Позірк. Аб тактычных вучэннях з “падраздзяленнямі, якія прыцягваюцца да праверкі баявой гатоўнасці” Узброеных сіл, паведамляе прэс-служба Міністэрства абароны.

Адзначаецца, што вучэннямі кіруе камандуючы войскамі Паўночна-Заходняга аператыўнага камандавання генерал-маёр Аляксандр Бас.

Ён, як заяўляецца, “уручыў падраздзяленням баявое распараджэнне і паставіў задачы” — “ваеннаабавязаныя абсталююць пазіцый і маскіруюць тэхніку”.

“У найбліжэйшыя дні ім трэба будзе заняць абарону ў прызначаных раёнах і адбіць наступ умоўнага праціўніка”, — гаворыцца ў паведамленні.

“Мэта вучэння — праверыць здольнасць камандзіраў кіраваць сваімі падраздзяленнямі пры вядзенні абарончага бою, — сказаў Бас. — Для асабістага складу асноўная задача — атрыманне практыкі і ўдасканаленне навыкаў у ходзе правядзення адзіночнай падрыхтоўкі, баявога зладжвання ў складзе падраздзяленняў і самога вучэння. Асабісты склад, узбраенне і тэхніка, пункты кіравання гатовыя да правядзення гэтага мерапрыемства”.

У межах праверкі баявой гатоўнасці Узброеных сіл з запасу на зборы прызвана каля 5 тыс. ваеннаабавязаных, паведаміў 5 сакавіка начальнік Генеральнага штаба УС — першы намеснік міністра абароны Павел Муравейка.

Праверка баявой гатоўнасці арміі праводзіцца ў Беларусі з 3 лютага.

Рэжым Лукашэнкі бесперапынна праводзіць вучэнні, трэніроўкі, зборы на фоне абвастрэння стасункаў з Захадам і поўнамаштабнай вайны Расіі супраць Украіны, у якой афіцыйны Мінск падтрымлівае Крэмль.

У лютым 2022 года ўварванне ажыццяўлялася ў тым ліку з беларускай тэрыторыі.