Дзве непаўналетнія загінулі ў аўтааварыі ў Віцебскай вобласці, яшчэ тры чалавекі ў бальніцы

14 снежня, Позірк. Два чалавекі загінула, яшчэ тры апынулася ў бальніцы ў выніку аўтамабільнай аварыі ўвечары 14 снежня ў Віцебскай вобласці, паведамляе прэс-служба Міністэрства ўнутраных спраў.

Трагедыя адбылася на 140-м кіламетры дарогі Р-15 (Орша — Горкі). Паводле папярэдняй інфармацыі МУС, 20-гадовы кіроўца аўтамабіля “Фальксваген” не даў рады кіраванню, з’ехаў у кювет і ўрэзаўся ў дрэва.

Дзве дзяўчыны 14 і 17 гадоў памерлі. Кіроўца і яшчэ дзве пасажыркі (16 і 38 гадоў) атрымалі траўмы і былі шпіталізаваныя.

“На месцы здарэння працуюць супрацоўнікі ДАІ, МНС, следча-аператыўная група”, — паведамляе ведамства.

МУС у чарговы раз рэкамендавала кіроўцам “выбіраць бяспечную хуткасць, не здзяйсняць рэзкіх манеўраў”, усім, хто знаходзіцца ў салоне, трэба прышпільвацца рамянямі бяспекі.