Затрыманым у Тайландзе за п’яную бойку з паліцэйскімі аказаўся брэсцкі бізнесмен і майстар спорту Асійчук — СМІ
15 снежня, Позірк. Грамадзянінам Беларусі, затрыманым на Пхукет (Тайланд) за п’яны дэбош і бойку з паліцэйскімі, з’яўляецца жыхар Брэста Сяргей Асійчук, паведамляе выданне BGmedia.
Мужчына — уладальнік кампаніі “ЕўраЭкспарт”, зарэгістраванай у Камянецкім раёне (Брэсцкая вобласць). Кампанія займаецца экспартам і імпартам збожжавых і алейных культур і прадуктаў іх перапрацоўкі, а таксама перавозкамі, лагістыкай.
“ЕўраЭкспарт” таксама спансуе некалькі аматарскіх футбольных каманд, за якія Асійчук выступае ў якасці гульца. Раней ён гуляў у другой лізе чэмпіянату Беларусі за клубы, якім яго кампанія аказвала фінансавую падтрымку.
Адзначаецца, што ў адным з інтэрв’ю бізнесмен назваў сябе майстрам спорту па армрэстлінгу і кандыдатам у майстры па паўэрліфцінгу.
Са спасылкай на знаёмых Асійчука паведамляецца, што ён, верагодна, валодае парк-гатэлем “Фармат” у Камянецкім раёне (Брэсцкая вобласць), дзе сярод іншага праводзяцца аматарскія футбольныя турніры.
Асійчук нарадзіўся 9 снежня 1985 года. Выданне мяркуе, што паездка ў Тайланд “была прымеркаваная да дня нараджэння галавы сямейства”.
Раней тайландская газета Bangkok Post паведаміла, што 39-гадовы беларус абвінавачваецца ў нападзе на паліцэйскіх ноччу 11 снежня на востраве Пхукет.
У публікацыі ён названы Siarhei Asychuk. Адзначалася, што ён быў у нецвярозым стане і зладзіў дэбош у прысутнасці трох сваіх дзяцей.
Каля 3:10 паліцыя прыбыла на тэрыторыю перад гатэлем недалёка ад пляжу Карон, дзе мужчына ў ніжняй бялізне ствараў праблемы навакольным.
На апублікаваным відэазапісе ён бегае, крычыць, б’ецца з паліцыяй і ахоўнікамі, якія спрабуюць яго злавіць. Дзеці дэбашыра плачуць, просяць супакоіцца, а сваю маці — адысці ад яго. Жанчына яго спрабуе уціхамірыць, затым здымае затрыманне на камеру мабільнага тэлефона.
Грамадзянін быў затрыманы, яму прад’яўленыя абвінавачванні ў парушэнні грамадскага парадку і нападзе на супрацоўнікаў паліцыі.
Паводле звестак выдання, жонка і дзеці наведалі яго ў аддзяленні паліцыі і адправіліся дадому згодна з набытымі квіткамі.
12 снежня павінен быў адбыцца суд, пра яго вынік не паведамлялася.