Пракуратура Лейпцыга не выявіла складу злачынства ў дзеяннях дэпутата Дорнау ў Беларусі

20 снежня, Позірк. Пракуратура Лейпцыга (Германія) 20 снежня паведаміла, што не будзе пачынаць расследаванне супраць нямецкага бізнесмена і дэпутата зямлі Саксонія ад ультраправай партыі “Альтэрнатыва для Германіі” (АдГ) Ёрга Дорнау. Яго падазравалі ў выкарыстанні працы беларускіх палітвязняў.

Паведамляецца, што з юрыдычных прычын не ўдалося выявіць першапачатковыя прыкметы злачынства, якое магло б быць пераследавана паводле законаў Германіі.

У прэс-рэлізе пракуратуры адзначаецца, што Дорнау “абвінавачваўся ў працаўладкаванні людзей, у тым ліку палітвязняў, на ферме, якой ён кіраваў у Беларусі”. Скарга “заснаваная на паведамленнях СМІ пра апісанне падзей былым вязнем, які, паводле яго слоў, не быў абавязаны прымаць прапанову працы на ферме”. “Аднак замест знаходжання ў вязніцы ён аддаў перавагу працы на цыбульнай ферме. Праца не была прымусовай, але ўмовы ў турме былі катавальнымі”, — зрабіла заключэнне пракуратура.

У рэлізе адзначаецца, што “ў адпаведнасці з цяперашняй прававой сітуацыяй і крымінальнымі правапарушэннямі, пералічанымі ў артыкуле 6 Крымінальнага кодэкса, крымінальны пераслед заснаваны на так званым універсальным прававым прынцыпе і, такім чынам, не залежыць ад месца злачынства, закона месца злачынства і грамадзянства асобы. У дадзеным выпадку абвінавачанне было магчымае толькі ў адносінах злачынства гандлю людзьмі (артыкул 232 КК Германіі). Аднак, сыходзячы з вядомых на сёння фактаў, гэтага не існуе”.

Іншыя магчымыя правапарушэнні, “такія як прымусовая праца (арт. 232б) і эксплуатацыя працы (арт. 233), могуць пераследавацца ў Германіі толькі ў выпадку, калі яны здзейсненыя за мяжой (як тут, у Беларусі), калі злачынца з’яўляецца немцам на момант здзяйснення злачынства”, гаворыцца ў рэлізе.

“Нават калі пры апісаных абставінах у Германіі магла мець месца злачынная эксплуатацыя працы (арт. 233 КК), у Беларусі апісаная сітуацыя караецца толькі ў выпадку прымусовай працы. Аднак, паколькі доказаў гэтага няма, злачынства, у якім абвінавачваецца абвінавачаны, не можа пераследавацца ў Германіі адпаведна арт. 7 Крымінальнага кодэкса, нават калі злачынец з’яўляецца грамадзянінам Германіі”, — лічаць у пракуратуры.

“Таму пракуратура Лейпцыга ўстрымалася ад пачатку расследавання з прававых прычын”, — гаворыцца ў дакуменце.

24 верасня сайт reform.news апублікаваў матэрыял, у якім сцвярджалася, што ўладальнік ТАА “Цыбулька-Бел”, якая належыць Дорнау, заключыў пагадненне з лідскім Цэнтрам ізаляцыі правапарушальнікаў і рэгулярна прыцягваў палітзняволеных для працы на плантацыі цыбулі. Паведамлялася, што ім плацілі прыкладна 5 еўра ў дзень, пры гэтым нямецкі палітык нібыта “асабіста правяраў працу палітвязняў”.

Факт выкарыстання іх працы пазней пацвердзіў нямецкім тэлежурналістам былы палітзняволены Сяргей Чарняк, з якім яны сустрэліся ў Польшчы.

“Цыбулька-Бел” зарэгістраваная ў Адзіным дзяржаўным рэестры (АДР) 2 кастрычніка 2020 года ў аграгарадку Гуды (Гродзенская вобласць).

Упершыню пра беларускі бізнес Дорнау паведаміла сёлета ў красавіку нямецкая газета Welt am Sonntag, расследаванне якой размясціў у сябе папулярны таблоід Bild. Адзначалася, што за прыхаванне факта валодання “буйным сельгаспрадпрыемствам” дэпутату пагражала адказнасць. 7 жніўня яго аштрафавалі на 20.682 еўра.

25 верасня нямецкі юрыст Фердынанд Мюлер ініцыяваў расследаванне супраць Дорнау.

9 кастрычніка нямецкая тэлекампанія MDR паведаміла, што пракуратура Лейпцыга пацвердзіла паступленне заявы на Дорнау, які падазраецца ў выкарыстанні працы беларускіх палітвязняў, і пачатак папярэдняга расследавання.

У МЗС Германіі ў адказ на просьбу “Позірку” пракаментаваць паведамленні аб выкарыстанні працы палітзняволеных пад Лідай на цыбульнай плантацыі нямецкага бізнесмена заявілі, што “замежныя інвестары не павінны станавіцца саўдзельнікамі рэжыму і ўдзельнічаць у жорсткіх палітычных рэпрэсіях у Беларусі або атрымліваць ад іх выгаду”. Знешнепалітычнае ведамства паведаміла пра намер разабрацца ў сітуацыі.

5 снежня стала вядома, што Дорнау таксама падазраецца ў пастаўках тэхнікі ў Беларусь у парушэнне санкцый Еўрасаюза.