Колькасць замежных назіральнікаў на выбарах-2025 за няпоўны тыдзень амаль патроілася (выпраўлена)

Шаноўныя падпісчыкі і чытачы!

У заметцы “Колькасць замежных назіральнікаў на выбарах-2025 за няпоўны тыдзень амаль патроілася”, апублікаванай 28 снежня ў 11:45, замест Парламенцкай асамблеі Арганізацыі Дагавора аб калектыўнай бяспецы была памылкова пазначаная Парламенцкая асамблея Арганізацыі па бяспецы і супрацоўніцтву ў Еўропе. У тэкст унесеныя неабходныя змены, ніжэй публікуецца выпраўленая версія. Просім прабачэння.

28 снежня, Позірк. На 27 снежня Цэнтральная выбарчая камісія акрэдытавала 251 замежнага назіральніка за прэзідэнцкімі выбарамі 2025 года. З пачатку тыдня іх колькасць вырасла ў 2,7 раза (на 23 снежня — 93), сведчыць праведзены “Позіркам” аналіз даных ЦВК.

Ад Выканаўчага камітэта Садружнасці Незалежных Дзяржаў акрэдытаваны 141 наглядальнік (у 3,6 раза больш; 39), замежных выбарчых органаў — 20 (+53,4%; 13), Шанхайскай арганізацыі супрацоўніцтва — 8 (+60%; 5), колькасць “незалежных назіральнікаў” — 44 (рост у 3,7 раза; 12).

Нязменнай засталася колькасць назіральнікаў — прадстаўнікоў Міжпарламенцкай асамблеі СНД (18), парламентаў удзельнікаў СНД (3), Моладзевай арганізацыі Руху недалучэння (2) і Сакратарыята Нарады па ўзаемадзеянні і мерах даверу ў Азіі (1).

Акрэдытаваныя назіральнікі Парламенцкай асамблеі Арганізацыі Дагавора аб калектыўнай бяспецы, якая раней не фігуравала ў пераліку, — 14.

Спіс нацыянальных назіральнікаў, дапушчаных да працы выбарчымі камісіямі розных узроўняў, з 23 снежня не абнаўляўся.

На названую дату ў ім фігуравала 960 чалавек, сярод якіх прадстаўнікі грамадскіх арганізацый — 696, або 72,5% (прафсаюзы ФПБ — 154, БРСМ — 149, ГА “Белая Русь” — 128, Беларускі саюз жанчын — 100, Беларускае грамадскае аб’яднанне ветэранаў — 99, іншыя — 66), палітычных партый — 179, або 18,7% (“Белая Русь” — 104, Кампартыя — 49, Рэспубліканская партыя працы і справядлівасці — 19, Ліберальна-дэмакратычная партыя — 7), асобныя грамадзяне, якія падалі адпаведную заяву, — 63, або 6,6%, а таксама вылучэнцы працоўных калектываў — 22, або 2,3%.

Усе пералічаныя структуры лаяльныя да рэжыму Аляксандра Лукашэнкі.

23 снежня Цэнтрвыбаркам зарэгістраваў пяць кандыдатаў на пасаду прэзідэнта. Акрамя Лукашэнкі, гэта лідары праўладных структур — Сяргей Сыранкоў (КПБ), Аляксандр Хіжняк (РППС), Алег Гайдукевіч (ЛДПБ), а таксама былы член Аб’яднанай грамадзянскай партыі, дэпутат Палаты прадстаўнікоў у 2016–2019, удзельніца выбарчай кампаніі 2020 года Ганна Канапацкая.

Сёмыя прэзідэнцкія выбары адбудуцца 26 студзеня 2025 года.

Прэзідэнцкая кампанія праходзіць пад поўным кантролем уладаў. Палітычнае поле краіны цалкам зачышчанае ад актыўных апанентаў Лукашэнкі. Прадстаўнікі беларускіх дэмакратычных сіл за мяжой называюць тое, што адбываецца, “спецаперацыяй па ўтрыманні ўлады”, праваабаронцы кажуць пра імітацыю канкурэнцыі.

З 1996 года ніводная выбарчая кампанія ў Беларусі не была прызнаная незалежнымі назіральнікамі транспарэнтнай і адпаведнай дэмакратычным стандартам.