30 снежня, Позірк. Спрошчаны парадак выдачы праязнога дакумента замежніка, які дзейнічае ў Польшчы для грамадзян Беларусі, падоўжаны да 30 чэрвеня 2025 года.
Пра гэта паведамляецца на сайце ўрада Польшчы.
7 снежня прыняцце такога рашэння анансаваў Аб’яднаны пераходны кабінет.
Спрошчаны парадак выдачы беларусам польскага праязнога дакумента ўведзены дзвюма пастановамі Міністэрства ўнутраных спраў і адміністрацыі Польшчы, якія набылі моц 1 ліпеня 2023 года. Адно з іх вызваляе беларусаў ад выплаты збору за праязны дакумент, другое — пашырае кола тых, хто можа прасіць пра яго выдачу, вызваляе ад неабходнасці даказваць тое, што асоба не мае магчымасці атрымаць праязны дакумент на радзіме. Улады Польшчы ўжо некалькі разоў падаўжалі адпаведнае рашэнне.
Напрыканцы траўня 2024 года Цэнтр беларускай салідарнасці паведаміў, што МУСіА Польшчы працуе над тым, каб павялічыць тэрмін дзеяння згаданага дакумента — “з вялікай верагоднасцю” — з аднаго да трох гадоў.
На той момант з дзейнымі дазволамі ў Польшчы пражывала больш за 130 тыс. грамадзян Беларусі.
