Спрошчаны парадак выдачы беларусам польскага праязнога дакумента падоўжаць да 30 чэрвеня 2025 года — АПК
Намеснік кіраўніка МУСіА Польшчы Мацей Душчык на сустрэчы з прадстаўнікамі беларускіх дэмсіл
7 снежня, Позірк. Спрошчаны парадак выдачы праязнога дакумента замежніка, які дзейнічае ў Польшчы для грамадзян Беларусі, будзе падоўжаны да 30 чэрвеня 2025 года, паведамляе прэс-служба Аб’яднанага пераходнага кабінета (АПК).
Адпаведнай інфармацыяй, паводле сцвярджэння палітычнай структуры, намеснік міністра ўнутраных спраў і адміністрацыі (МУСіА) Мацей Душчык падзяліўся 6 снежня на сустрэчы з намеснікам кіраўніцы АПК Паўлам Латушкам, членам Каардынацыйнай рады Вольгай Карпушонак і кіраўніцай ініцыятывы Partyzanka Ганнай Маціеўскай.
Адзначаецца, што бакі абмеркавалі пытанні прызнання праязнога дакумента замежніка “ў якасці дакумента, які сведчыць асобу на тэрыторыі Польшчы”, тэрміну яго дзеяння (цяпер — адзін год). Паводле інфармацыі АПК, МУСіА аналізуе “тэхнічныя і прававыя магчымасці”, каб павялічыць тэрмін дзеяння дакумента “да двух ці трох гадоў”. Разам з тым, як было заяўлена, “рэалізацыя гэтага падыходу запатрабуе захавання стандартаў біяметрыі”.
Латушка ўзняў пытанне пра легалізацыю ў Польшчы беларускіх добраахвотнікаў, якія ваявалі на баку Украіны. Асобна была закранутая тэма “аб аднаўленні функцыянавання рабочай групы па пытаннях, звязаных са знаходжаннем грамадзян Беларусі ў Рэспубліцы Польшча”.
Душчык, як сцвярджае АПК, запэўніў суразмоўцаў, што новая міграцыйная палітыка краіны “не накіравана супраць беларусаў”, яна патрэбна для таго, каб “узмацніць супрацьдзеянне нелегальнай міграцыі”.
Прэс-служба МУСіА па выніках сустрэчы толькі коратка паведаміла, што “перамовы былі прысвечаныя пытанням, што тычацца беларусаў, якія знайшлі працу або прытулак у Польшчы”.
Спрошчаны парадак выдачы беларусам польскага праязнога дакумента ўведзены дзвюма пастановамі МУСіА, якія набылі моц 1 ліпеня 2023 года. Адно з іх вызваляе беларусаў ад выплаты збору за праязны дакумент, другое — пашырае кола тых, хто можа прасіць пра яго выдачу, вызваляе ад неабходнасці даказваць тое, што асоба не мае магчымасці атрымаць праязны дакумент на радзіме. Улады Польшчы ўжо некалькі разоў падаўжалі адпаведнае рашэнне.
Напрыканцы траўня 2024 года Цэнтр беларускай салідарнасці паведаміў, што МУСДІА Польшчы працуе над тым, каб павялічыць тэрмін дзеяння згаданага дакумента — “з вялікай верагоднасцю” — з аднаго да трох гадоў.
На той момант з дзейнымі дазволамі ў Польшчы пражывала больш за 130 тыс. грамадзян Беларусі.