У Беларусі чакаецца парывісты вецер і завіруха, папярэджвае МНС

4 студзеня, Позірк. Паўднёва-заходні, заходні вецер хуткасцю 5–10 метраў на секунду, а ў многіх раёнах з парывамі да 15–20 м/c прагназуецца ў Беларусі 4 студзеня, паведамляе Міністэрства па надзвычайных сітуацыях.

На большай частцы краіны пройдзе кароткачасовы снег, месцамі завіруха; на асобных участках дарог галалёдзіца. Тэмпература паветра на працягу сутак будзе ад нуля да 6 градусаў марозу.

Умовы надвор’я, папярэджвае МНС, могуць прывесці да пашкоджання або абрыву ліній сувязі і электраперадачы, парушэння электразабеспячэння, адключэння электрычных падстанцый, электраэнергіі ў населеных пунктах; пашкоджання або абвальвання слаба ўмацаваных канструкцый, дахаў будынкаў, збудаванняў, падзення дрэў.