У 2024 годзе не менш як 2 тыс. чалавек прыцягнулі да адказнасці за “экстрэмісцкія матэрыялы” — праваабаронцы
4 студзеня, Позірк. Летась не менш як 2 тыс. чалавек прыцягнулі да адказнасці паводле арт. 19.11 КаАП (распаўсюд, выраб, захоўванне, перавозка інфармацыйнай прадукцыі, якая ўтрымлівае заклікі да экстрэмісцкай дзейнасці або прапагандуе такую дзейнасць), сведчыць маніторынг праваабарончага цэнтра “Вясна”.
“Гэтая лічба няпоўная і можа быць значна большай, паколькі рэжым усё больш дбайна хавае рэпрэсіі ў краіне”, — падкрэслілі праваабаронцы.
Паводле даных “Вясны”, за 2024 год суды прынялі 1.444 рашэнні аб прызнанні інфармацыйнай прадукцыі, сімволікі, атрыбутыкі, друкаваных і кніжных выданняў “экстрэмісцкімі матэрыяламі”.
Адзначаецца, што летась было прынята 40,5% усіх рашэнняў аб папаўненні спісу “экстрэмісцкіх матэрыялаў”, які існуе 16 гадоў (першы запіс зроблены 4 верасня 2008 года). У 2023 годзе суды прынялі 888 такіх рашэнняў, 2022-м — 637.
“Вясна” звярнула ўвагу, што адным судовым рашэннем адпаведны статус можа быць нададзены некалькім матэрыялам (на 1 лістапада 2024 года, паводле падліку даследчыкаў, у пераліку фігуравала 6.565 пазіцый).
У адпаведнасці з працэдурай, гаворыцца ў справаздачы праваабаронцаў, патрабаванне прызнаць нешта “экстрэмісцкімі матэрыяламі” выстаўляе “суб’ект супрацьдзеяння экстрэмізму або пракурор”, суд разглядае заяву “ў парадку асаблівай вытворчасці”. Працэсы праходзяць у закрытым рэжыме, а змесціва матэрыялаў і прычыны прызнання іх “экстрэмісцкімі” не раскрываюцца.
За мінулы год “экстрэмісцкімі матэрыяламі” прызналі не менш як чатыры музычныя кліпы, больш за дзясятак кніг (у тым ліку тры кнігі палітвязня Паўла Севярынца); старонкі ініцыятыў, медыя, лідараў меркаванняў, экс-палітвязняў у сацсетках: “Інстаграме” — 348, “ЦікТоку” — 146, Х — 61.
Дзеці, чые бацькі прыцягваліся да адказнасці за нелаяльнасць уладам, могуць атрымліваць статус такіх, што знаходзяцца ў сацыяльна небяспечным становішчы
2 студзеня, Позірк. Дзеці, чые бацькі прыцягваліся да адказнасці за нелаяльнасць уладам, могуць атрымліваць статус такіх, што знаходзяцца ў сацыяльна небяспечным становішчы (СНС), вынікае з пастановы Савета міністраў ад 30 снежня 2024 года № 1055 “Аб прызнанні дзяцей такімі, што …