Дзеці, чые бацькі прыцягваліся да адказнасці за нелаяльнасць уладам, могуць атрымліваць статус такіх, што знаходзяцца ў сацыяльна небяспечным становішчы
2 студзеня, Позірк. Дзеці, чые бацькі прыцягваліся да адказнасці за нелаяльнасць уладам, могуць атрымліваць статус такіх, што знаходзяцца ў сацыяльна небяспечным становішчы (СНС), вынікае з пастановы Савета міністраў ад 30 снежня 2024 года № 1055 “Аб прызнанні дзяцей такімі, што знаходзяцца ў сацыяльна небяспечным становішчы і маюць патрэбу ў дзяржаўнай абароне“.
Дакумент афіцыйна апублікаваны і набыў моц 1 студзеня 2025 года.
У прыватнасці, згодна з дакументам, паказчыкам СНС з’яўляецца ўстанаўленне фактаў прыцягнення і (або) вызвалення ад адміністрацыйнай адказнасці за правапарушэнні па артыкулах 19.1, 19.4, 19.10, 19.11, 25.11 Кодэкса аб адміністрацыйных правапарушэннях.
У дачыненні да грамадзян, якія карыстаюцца незалежнымі крыніцамі інфармацыі (улады лічаць яе “экстрэмісцкімі матэрыяламі“), масава ўжываецца арт. 19.11 — “Распаўсюд, выраб, захоўванне, перавозка інфармацыйнай прадукцыі, якая змяшчае заклікі да экстрэмісцкай дзейнасці або прапагандуе такую дзейнасць“.
Арт. 19.4 (“Уцягванне непаўналетняга ў антыграмадскія паводзіны”) прадугледжвае адказнасць у тым ліку за “ўцягванне непаўналетняга ва ўдзел у сходзе, мітынгу, вулічным шэсці, дэманстрацыі, пікетаванні, іншым масавым мерапрыемстве, якія праводзяцца з парушэннем устаноўленага парадку”. Зараз у краіне дазволеная вулічная актыўнасць толькі праўладнага толку.
Арт. 19.1 (“Дробнае хуліганства“) — за такое правапарушэнне раней актыўна прыцягваліся да адказнасці грамадзяне, якія ўдзельнічалі ў вулічных акцыях, ім ставілася ў віну галоўным чынам “нецэнзурная лаянка ў грамадскім месцы”.
Арт. 19.10 (“Прапаганда або публічнае дэманстраванне, выраб, распаўсюджванне нацысцкай сімволікі або атрыбутыкі“) — у 2021 годзе МУС прапанавала ўключыць нацыянальны бел-чырвона-белы сцяг разам з прывітаннем “Жыве Беларусь!“ у пералік нацысцкай сімволікі і атрыбутыкі. У выніковую пастанову ведамства ад 28 кастрычніка 2022 года “Аб устанаўленні пералікаў арганізацый і іншых структур, нацысцкай сімволікі і атрыбутыкі“ было ўключана толькі прывітанне, аднак дэ-факта ўлады пераследуюць грамадзян за сцяг альбо яго выяву.
Арт. 25.11 (“невыкананне патрабаванняў прэвентыўнага нагляду або прафілактычнага назірання“) — ужываецца для пакарання грамадзян, якія адбылі пакаранне па палітычных артыкулах Крымінальнага кодэкса і знаходзяцца пад наглядам міліцыі.
Пастанова ўрада будзе прымяняцца заднім днём: “Рашэнні аб прызнанні дзяцей такімі, што знаходзяцца ў сацыяльна небяспечным становішчы, прынятыя да набыцця гэтай пастановай моцы, падлягаюць перагляду камісіямі па справах непаўналетніх гарадскіх, раённых выканаўчых камітэтаў, мясцовых адміністрацый раёнаў у гарадах у адпаведнасці з Палажэннем аб парадку прызнання дзяцей такімі, што знаходзяцца ў сацыяльна небяспечным становішчы і маюць патрэбу ў дзяржаўнай абароне, зацверджаным гэтай пастановай, на працягу шасці месяцаў пасля набыцця ім моцы”.
Сярод мер “дзяржаўнай абароны” — пазбаўленне бацькоўскіх правоў і адбіранне дзіцяці з сям’і.