Прышчэпліваць ад COVID-19 у Беларусі будуць новай расійскай вакцынай

9 студзеня, Позірк. У 2025 годзе вакцынаваць ад COVID-19 будуць новай расійскай вакцынай “Канвасэл“, паведаміла намеснік міністра аховы здароўя — галоўны дзяржаўны санітарны лекар Святлана Нячай.

“Павінна адзначыць, што вакцына, якая выкарыстоўваецца ў цяперашні перыяд вакцынацыі (…) створаная на аснове рэкамбінантныя бялку, які не змяняе сваю структуру, які не зведвае мутацыю і таму не патрабуе актуалізацыі дадзенага складу. Дадзеная вакцына будзе актыўная ў дачыненні да большасці вірусаў каранавіруса, якія цыркулююць на тэрыторыі нашай краіны“, — цытуе чыноўніцу прэс-служба Міністэрства аховы здароўя.

Нячай заклікала вакцынавацца як ад каранавіруса, так і ад грыпу, адзначыўшы, што “ў сумежных дзяржавах нарастае захворванне“ другім.

Вакцына “Конвасэл” выпускаецца Санкт-Пецярбургскім навукова-даследчым інстытутам вакцын і сываратак і прадпрыемствам па вытворчасці бактэрыйных прэпаратаў Федэральнага медыка-біялагічнага агенцтва. Зарэгістраваная ў РФ у 2022 годзе.

Раней асноўным прэпаратам для вакцынацыі ў Беларусі быў расійскі “Спутник V”, які з прычыны неэфектыўнасці супраць віруса, які мутаваў, не выпускаецца з 2022 года, паводле звестак вытворцы НІЦЭМ імя Н. Ф. Гамалеі.

Былы міністр аховы здароўя Дзмітрый Піневіч 10 снежня 2022 года анансаваў выпуск у абарачэнне айчыннай вакцыны ад кавіду ў 2023 годзе.

Пра пачатак будаўніцтва завода па вытворчасці вакцын Міністэрства аховы здароўя паведаміла ў лютым 2022 года.

Пазней адзначалася, што праз уведзеныя супраць Беларусі санкцыі графік пастаўкі абсталявання з Германіі, Польшчы, Паўднёвай Карэі зменены, аднак вядзецца падрыхтоўка да адпрацоўкі тэхналогіі вытворчасці доследна-прамысловай серыі вакцыны.

3 лістапада 2021 года Аляксандр Лукашэнка падпісаў указ аб рэалізацыі інвестпраекта па выпуску вакцыны супраць COVID-19 на ААТ “БелВітуніфарм“, якое спецыялізуецца на вытворчасці ветэрынарных прэпаратаў, з агульным аб’ёмам фінансавання 68,1 млн рублёў. З тлумачэнняў Міністэрства аховы здароўя вынікала, што“ Белмедпрэпараты “будуць вырабляць актыўны кампанент, а гатовую вакцыну разліваць на магутнасцях прадпрыемства “БелВітуніфарм”, якое вырабляе больш за 150 найменняў ветэрынарных прэпаратаў.

Разам з тым 12 лістапада 2021 года на “Белмедпрэпаратах“ быў прадстаўлены інвестыцыйны праект арганізацыі на гэтым прадпрыемстве поўнага цыкла фармацэўтычнай вытворчасці расійскай вектарнай вакцыны ад кавіду “Спутник V“ з аб’ёмам фінансавання 56 млн долараў. Пасля Міністэрства аховы здароўя не паведамляла, ці наладзілі “Белмедпрэпараты“ прамысловы выпуск вакцыны.

Да сярэдзіны снежня 2023 года на пляцоўцы “БелВітуніфарма” было выпушчана тры доследна-прамысловыя серыі вакцыны супраць кавіду. 29 снежня 2023 года паведамлялася, што Цэнтр экспертыз і выпрабаванняў у ахове здароўя Міністэрства аховы здароўя зарэгістраваў айчынную інактываваную цэльнавірыённую вакцыну для медыцынскай прафілактыкі COVID-19.

ААТ “БелВітуніфарм” гатовае ў год выпускаць да 4 млн доз вакцыны ад каранавіруса, заявіў у студзені 2024 года кіраўнік прадпрыемства Сяргей Бальшакоў. У грамадзянскі абарот, паводле яго слоў, вакцына павінна была паступіць ужо летась пасля правядзення дзяржзакупак Міністэрствам аховы здароўя. Пасля інфармацыі пра беларускую вакцыну не было.

Пра сітуацыю з захворваннем і смяротнасцю ад COVID-19 міністэрства па-ранейшаму не інфармуе насельніцтва. Актуальныя звесткі не публікуюцца пасля 5 ліпеня 2022 года.

Ініцыятыва медыкаў “Белыя халаты” ў чэрвені мінулага года заявіла пра “блытаніну” ў вытворчасці беларускай вакцыны супраць COVID-19. Актывісты канстатавалі, што планы выпуску вакцыны не выкананыя.