Ціханоўская: Я, вядома, застаюся з вамі плячо ў плячо, каб працягваць барацьбу дзеля роднай Беларусі

25 студзеня, Позірк. Беларускі дэмакратычны лідар Святлана Ціханоўская зняпраўдзіла інфармацыю пра свой сыход.

“Я была ў дарозе і не змагла адразу адрэагаваць на фэйкавае відэа, якое з’явілася, пра тое, што я некуды сыходжу, — адзначыла яна ў кароткім відэазвароце ў афіцыйным тэлеграм-канале. — Мае дарагія беларусы ды беларусачкі, я, вядома, застаюся з вамі плячо ў плячо, каб працягваць нашу барацьбу дзеля нашай роднай Беларусі”.

Як паведамляў “Позірк”, 25 студзеня, перад асноўным днём галасавання на мерапрыемстве, якое афіцыйны Мінск называе “прэзідэнцкімі выбарамі”, у інтэрнэце пачалі актыўна распаўсюджваць фэйкавы відэазапіс пра “сыход” Ціханоўскай і “перадачу паўнамоцтваў” Паўлу Латушку.

Першакрыніцай запісу, створанага, верагодна, пры дапамозе штучнага інтэлекту, паслужыў тэлеграм-канал, які мімікруе пад афіцыйны рэсурс Ціханоўскай. Падробку сярод іншага выдае імя, якое адрозніваецца ад афіцыйнага, — @tsikhanoyskaya замест @tsikhanouskaya.

Відэазапіс стаў актыўна прасоўвацца ў тым ліку ў тэлеграм-каналах беларускіх дыяспар.

Галоўны дарадца палітыка Франак Вячорка пацвердзіў “Позірку“, што ні пра што падобнае Ціханоўская не заяўляла.