Патрыярх Кірыл спадзяецца на супрацу ўладаў і БПЦ падчас далейшага кіравання Лукашэнкі

27 студзеня, Позірк. З перамогай у тым, што афіцыйны Мінск лічыць “прэзідэнцкімі выбарамі”, павіншаваў Аляксандра Лукашэнку патрыярх Маскоўскі і ўсяе Русі Кірыл.

У віншаванні іерарха, апублікаваным на партале Рускай праваслаўнай царквы (РПЦ), сцвярджаецца, што Лукашэнка “самааддана служыць беларускаму народу, адстойвае дзяржаўныя і нацыянальныя інтарэсы, клапоціцца пра гарманічнае сацыяльна-эканамічнае развіццё краіны, пра ўмацаванне асноў мірнага і шчаснага жыцця грамадзян”.

На думку Кірыла, беларускі палітык “нязменна надае вялікую ўвагу духоўна-маральнаму стану грамадства і падтрымцы традыцыйных сямейных каштоўнасцей”.

“Выказваю надзею на далейшае развіццё ўзаемадзеяння органаў дзяржаўнай улады краіны і Беларускай праваслаўнай царквы. Перакананы, што працяг гэтай супрацы прынясе нямала добрых пладоў і паслужыць дабру жыхароў рэспублікі”, — гаворыцца ў віншаванні.

Лукашэнка і патрыярх Кірыл рэгулярна абменьваюцца кампліментарнымі заявамі. Напрыклад, 20 лістапада 2024 года, беларускі палітык, віншуючы прадстаяцеля РПЦ з 78-годдзем, заявіў, што яго жыццё — “прыклад самаахвярнага служэння ідэалам дабра і міласэрнасці”.

У сваю чаргу праваслаўны іерарх летась паднёс на 70-годдзе Лукашэнку падарунак — ордэн святога благавернага князя Данііла Маскоўскага (I ступені) за “развіццё царкоўна-дзяржаўных стасункаў”.

Патрыярх Кірыл неаднаразова выказваўся ў падтрымку ваеннай агрэсіі Расіі супраць Украіны, называў вайну “свяшчэннай”.

Паводле даных Цэнтрвыбаркама Беларусі, Аляксандр Лукашэнка атрымаў 5.136.293 голаса (86,82%), Сяргей Сыранкоў (Камуністычная партыя Беларусі) — 189.740 (3,21%), Алег Гайдукевіч (Ліберальна-дэмакратычная партыя Беларусі) — 119.272 (2,02%), Ганна Канапацкая (былы член Аб’яднанай грамадзянскай партыі, дэпутат Палаты прадстаўнікоў у 2016–2019 гадах, удзельніца выбарчай кампаніі 2020 года) — 109.760 (1,86%), Аляксандр Хіжняк (Рэспубліканская партыя працы і справядлівасць) — 102.729 (1,74%). Супраць усіх прагаласавала 213.277 выбаршчыкаў (3,60%).

Канчатковыя вынікі выбараў-2025 будуць падведзеныя 3 лютага.