Пагранічнікі вынялі два дроны на мяжы з Літвой
31 студзеня, Позірк. Пра два выяўленыя факты незаконнага захоўвання беспілотнікаў паведамляе прэс-служба Дзяржаўнага пагранічнага камітэта.
Паводле інфармацыі ведамства, адзін дрон быў знойдзены 29 студзеня ў вёсцы Вашкелі (Воранаўскі раён Гродзенскай вобласці) пры адпрацоўцы “аператыўнай інфармацыі”. Апрача беспілотнага апарата пагранічнікі, якія дзейнічалі “пры сілавой падтрымцы АМАП”, знайшлі пульты, акумулятарныя батарэі, зарадныя станцыі, камплектуючыя да дрона, прыборы начнога бачання, цеплавізар і планшэт.
Другі беспілотнік, камплектуючыя да яго, а таксама катапульту для запуску знайшлі паблізу вёскі Пасольч (Воранаўскі раён).
Абодва населеныя пункты знаходзяцца непадалёк ад мяжы з Літвой.
Дроны і камплектуючыя да іх вынялі і даставілі ва ўпраўленне Лідскага пагранічнага атрада — “для правядзення далейшага разбіральніцтва”. Паведамляецца, што распачаты адміністрацыйны працэс паводле ч. 1 арт. 24.19 КаАП (парушэнне памежнага рэжыму).
Паводле даных Дзяржпагранкамітэта, ад пачатку года лідскія пагранічнікі канфіскавалі ўжо чатыры беспілотнікі. Папярэдні выпадак здарыўся 14 студзеня — таксама ў Воранаўскім раёне.
Адметна, што ў той дзень Міністэрства абароны паведаміла пра тактычныя зборы ў Гродзенскім гарнізоне з камандзірамі батальёнаў (дывізіёнаў) і іх намеснікамі “з акцэнтам на навучанне супрацьдзеянню беспілотным лятучым апаратам”.
Апошнім часам дроны і аэрастаты актыўна выкарыстоўваюць кантрабандысты, каб нелегальна дастаўляць у Літву грузы, у асноўным цыгарэты беларускай вытворчасці.
1 красавіка 2024 года набыў моц указ № 297 “Аб дзяржаўным уліку і эксплуатацыі грамадзянскіх беспілотных лятучых апаратаў”, які забараняе ўвоз, захоўванне, абарот, эксплуатацыю і выраб беспілотнікаў і выкарыстанне паветранай прасторы без належнага дазволу.
Акрамя таго, за “незаконнае ўтрыманне і выкарыстанне беспілотнікаў у пагранічнай зоне або пагранічнай паласе” прадугледжана адміністрацыйная адказнасць паводле арт. 24.19 КаАП – штраф да 50 базавых велічынь (да 2.100 рублёў).