31 студзеня, Позірк. За мінулыя дзяжурныя суткі (з 6:00 30 студзеня да 6:00 31-га) у Беларусі ад наступстваў пажару загінуў адзін чалавек, сведчыць аператыўная зводка Міністэрства па надзвычайных сітуацыях.
Мінскае абласное ўпраўленне МНС удакладняе, што гаворка пра грамадзяніна 1947 года нараджэння, які памёр у бальніцы ад траўмаў, атрыманых на пажары 25 студзеня.
Па выніках таго дня ведамства паведамляла пра пажар у кватэры аднапавярховага двухкватэрнага дома ў Барысаве (Мінская вобласць). Паводле інфармацыі ратавальнікаў, на сямейнай пары, мужчыну 1947 г.н. і жанчыне 1949 г.н., загарэлася адзенне — у выніку “ўспышкі пароў вадкасці з утрыманнем спірту падчас прыгатавання самагону”. Абодва атрымалі апёкі і былі шпіталізаваныя.
У якім стане знаходзіцца другая пацярпелая, невядома.
З пачатку года ў Беларусі адбылося 508 пажараў — на 8,1% менш, чым за аналагічны перыяд 2024-га (553). Загінула 74 чалавекі (-8,6%; 81), траўмавана — 52 (+6,1%; 49).
