Польшча абвясціла ў вышук асуджаную за шпіянаж беларуску

6 лютага, Позірк. Польшча абвясціла ў вышук асуджаную за шпіянаж 38-гадовую беларуску Дар’ю Астапенка, вынікае з абвесткі адпаведнай службы гэтай дзяржавы.

Астапенка адшукваецца на падставе ч. 1 арт.130 Крымінальнага кодэкса Польшчы (удзел у дзейнасці замежнай выведкі (шпіянаж)).

Раней стала вядома, што асуджаная не з’явілася адбываць пакаранне ў выглядзе пазбаўлення волі на тэрмін адзін год і восем месяцаў і не аплаціла штраф у памеры 15,5 тыс. злотых (каля 3.850 долараў).

Партал gazeta.pl адзначаў, спасылаючыся на матэрыялы суда, што Астапенка прызнала віну ў судзе.

Жанчыне паставілі ў віну прадастаўленне спецслужбам Беларусі інфармацыю аб фінансавай структуры фонду “Беларускі дом” і арганізаваных ім мерапрыемствах, якія праводзіліся з падтрымкай Міністэрства замежных спраў Польшчы. Таксама беларуска ў інтэрнэце абвінаваціла Польшчу ў “падрыхтоўцы службаў, якія спецыялізуюцца на нападах на аб’екты інфраструктуры Беларусі”.

Сцвярджаецца таксама, што перададзеная ёю інфармацыя была распаўсюджаная ў заяве кіраўніка КДБ Івана Церцеля, які 13 снежня 2023 года паведаміў аб актыўнасці членаў беларускіх арганізацый у Польшчы і іх нібыта планах ажыццявіць дыверсійна-тэрарыстычныя акцыі на тэрыторыі Беларусі. Удзельнікі сямі “незаконных фарміраванняў”, якія знаходзяцца ў Польшчы, вядуць падрыхтоўку да “ажыццяўлення тэрактаў у Беларусі”, сцвярджаў Церцель, пералічыўшы імёны канкрэтных людзей.

Таксама адзначалася, што Астапенка “ператварыла здзейсненыя ёю злачынствы ў пастаянную крыніцу даходу, прыняўшы анлайн-пераводы ад супрацоўнікаў КДБ на суму 15.500 злотых менш чым за два месяцы”.

Як паведамлялася раней, у жніўні 2024 года пракуратура Польшчы перадала ў Акруговы суд Варшавы справу грамадзянкі Беларусі Дар’і А., якая абвінавачваецца ў шпіянажы (арт. 130 КК Польшчы). У ходзе расследавання ўстаноўлена, што ў 2023 годзе фігурантка “неаднаразова падавала супрацоўнікам камітэта бяспекі Беларусі інфармацыю аб дзейнасці, структуры і фінансаванні арганізацый, якія аказваюць падтрымку беларускай апазіцыі». Паводле звестак СМІ, гаворка ішла пра былую апазіцыйную актывістку з Баранавічаў (Брэсцкая вобласць) Дар’і Астапенку.