У 81-гадовага жыхара Клайпеды знайшлі склад кантрабандных беларускіх цыгарэт

12 лютага, Позірк. У 81-гадовага жыхара Клайпеды знойдзены склад кантрабандных беларускіх цыгарэт, паведамляе Служба аховы дзяржаўнай мяжы (САДМ) Літвы.

Паводле інфармацыі ведамства, 11 лютага мужчыну ў двары дома ў цэнтры горада праверылі супрацоўнікі Крымінальнай выведкі САДМ. Пры ім сярод іншага знайшлі 20 пачкаў цыгарэт беларускай вытворчасці.

У доме ў затрыманага знайшлі 3.850 пачкаў розных марак цыгарэт з беларускімі акцызамі, у машыне — яшчэ 500. Адзначаецца, што агульны кошт тытунёвых вырабаў з улікам падаткаў, абавязковых да выплаты ў Літве, складае 19,5 тыс. еўра.

Пракуратура распачала дасудовае расследаванне “па факце незаконнага валодання акцызнымі таварамі і самаробнымі моцнымі алкагольнымі напоямі”; мужчыну пагражае да 4 гадоў пазбаўлення волі.

Пасля допыту затрыманага адпусцілі, папярэдне ўзяўшы пісьмовае абавязацельства не пакідаць месца жыхарства.

Некалькі гадоў таму, паводле інфармацыі САДМ, гэты ж мужчына за “незаконнае валоданне акцызнымі таварамі” быў аштрафаваны амаль на 10 тыс. еўра.

На пачатку лютага памежнае ведамства рапартавала пра скарачэнне кантрабанды цыгарэт з Беларусі. Паводле даных САДМ, у 2024 годзе памежнікі канфіскавалі 1 млн 386 тыс. 714 пачкаў кантрабандных цыгарэт. У параўнанні з 2023 годам зафіксавана памяншэнне ў 1,7 раза (было 2,5 млн пачкаў), 2022-м — больш чым у 3 разы (4,3 млн).

У 2024 годзе літоўскія памежнікі затрымалі 340 чалавек за кантрабанду або незаконную перавозку падакцызных тавараў, у 2023 годзе — 447, у 2022-м — 475. Кантрабанду ў асноўным перавозілі грамадзяне Літвы, падкрэслівала памежная служба.