Заблакаваны тэлеграм-канал кааліцыі Латушкі ў КР

17 лютага, Позірк. Тэлеграм-канал кааліцыі Каардынацыйнай рады “Каманда Латушкі і Рух “За Свабоду” заблакаваны за “парушэнне правілаў”. Пра гэта паведаміў намеснік старшыні Аб’яднанага пераходнага кабінета, кіраўнік Народнага антыкрызіснага ўпраўлення, кіраўнік згаданай кааліцыі Павел Латушка.

Палітык мяркуе, што “гэта звязана з масіраванымі нападамі з боку рэжыму праз скаргі на канал”. “Пры гэтым, відавочна, у канале не публікаваўся кантэнт, які парушае правілы платформы”, — адзначыў ён.

“У цяперашні час мы спрабуем абскардзіць рашэнне аб блакаванні і аднавіць канал. У любым выпадку мы працягнем нашу інфармацыйную працу, накіраваную на барацьбу з дэзінфармацыяй з боку рэжыму Лукашэнкі”, — падкрэсліў Латушка.

Кааліцыя з’яўляецца найбуйнейшай у Каардынацыйнай радзе: 28 месцаў з 80.

Інфармацыйныя рэсурсы структур дэмсіл, грамадскіх ініцыятыў і незалежных СМІ рэгулярна падвяргаюцца атакам з боку прадстаўнікоў рэжыму Аляксандра Лукашэнкі.