Мерц вітаў вызваленне палітвязняў у Беларусі — яму запярэчыў ультраправы дэпутат, фігурант карупцыйнага скандалу

14 снежня, Позірк. Канцлер Германіі Фрыдрых Мерц вітаў вызваленне групы беларускіх палітвязняў.

“Гэтая навіна з Беларусі напаўняе мяне радасцю: вызваленне Марыі Калеснікавай, Алеся Бяляцкага і іншых палітвязняў даўно наспела і з’яўляецца поспехам для мужнай грамадзянскай супольнасці, якая змагаецца за свабоду і грамадзянскія правы. Мы на яе баку“, — напісаў канцлер у “Х”.

Яго заяву раскрытыкаваў дэпутат Бундэстага ад ультраправай партыі “Альтэрнатыва для Нямеччыны”, былы дэпутат Еўрапейскага парламента Максіміліян Кра. “Чаму ж мы заўсёды на баку нейкіх ноунэймаў у нейкіх нерэлевантных краінах? Чаму мы ні разу не на баку Германіі?” — напісаў ён у каментарах.

У 2024 годзе Кра стаў фігурантам карупцыйнага скандалу, які ўзнік вакол яго памочніка ў Еўрапарламенце, выхадца з Кітая. У расследаванні, якое правялі нямецкія журналісты, гаварылася, што дэпутат мог атрымліваць праз памочніка грошы ад кітайскіх спецслужбаў.

Увосень 2025 года памочнік быў прыгавораны да 4 гадоў 9 месяцаў пазбаўлення волі.

Сам Кра быў пазбаўлены дэпутацкай недатыкальнасці для правядзення ператрусаў у яго доме і офісах. Супраць дэпутата былі высунутыя падазрэнні ў хабарніцтве і адмыванні грошай.