За суткі ад агню загінула чатыры чалавекі, яшчэ два памерла ў бальніцах ад раней атрыманых на пажарах траўм

25 лютага, Позірк. За мінулыя дзяжурныя суткі (з 6:00 24 лютага да 6:00 25 лютага) на пажарах у Беларусі загінула чатыры чалавекі, сведчаць даныя Міністэрства па надзвычайных сітуацыях.

Паводле інфармацыі Брэсцкага абласнога ўпраўлення МНС, раніцай 24 лютага ў агні загінула сястра гаспадара гарэлага дома ў вёсцы Ліпск (Ганцавіцкі раён), удзень — грамадзянін 1959 года нараджэння ў вёсцы Дварышча (Маларыцкі раён), раніцай 25 лютага — гаспадыня дома ў вёсцы Адахоўшчына (Баранавіцкі раён). Акрамя таго, у рэанімацыі памёр грамадзянін (1955 г.н.), які атрымаў траўмы на пажары 23 лютага ў Баранавічах.

Гомельскае абласное ўпраўленне МНС паведамляе пра гібель аднаго чалавека — у Светлагорскім раёне. Дэталі невядомыя.

Згодна са звесткамі Віцебскага абласнога ўпраўлення МНС, мінулым днём у бальніцы памёр чалавек, які пацярпеў на пажары 21 лютага ў Дубровенскім раёне.

З пачатку 2025 года ў Беларусі адбылося 1.138 пажараў — на 30,8% больш, чым за той жа перыяд 2024-га (870). Загінула 147 чалавек (+38,7%; 106), траўмавана — 76 (-9,5%; 84).