Лукашэнка даручыў Мінпрыроды шукаць рэдказямельныя матэрыялы

4 сакавіка, Позірк. Шукаць рэдказямельныя матэрыялы даручыў Аляксандр Лукашэнка Міністэрству прыродных рэсурсаў і аховы навакольнага асяроддзя на нарадзе па кадравых пытаннях 4 сакавіка.

“Актуальная тэма, — цытуе Лукашэнку ягоная прэс-служба. — Кажуць, што ў нас у адвалах ёсць рэдказямельныя мінералы. Трэба правесці разведку і астатняе: і хімія, і нафта, і газ, і іншае. Я ставіў адпаведную задачу перад адпаведным міністрам”.

Лукашэнка выказаў меркаванне, што геолагавыведка ў краіне развіта недастаткова: “Рэдказямельныя металы” вымаўляе толькі Трамп у Злучаных Штатах Амерыкі. Вы пакуль над гэтым не задумваліся. Іх шмат не бывае ў зямлі. Можа, у нас не менш, чым у іншых? <…> Трэба капаць, трэба глядзець, што ёсць у нас у зямлі”.

28 лютага Кіеў і Вашынгтон збіраліся падпісаць амерыкана-ўкраінскае пагадненне аб карысных выкапнях як частку прапанаванай новай амерыканскай адміністрацыяй здзелкі, прызначанай для завяршэння вайны Расіі супраць Украіны. Падпісанне дакумента сарвалася. Бакі разышліся ў поглядах на вайну (перамовы па рашэнні Трампа былі адкрытымі, у прысутнасці СМІ). Акрамя таго, прэзідэнт Украіны Уладзімір Зяленскі заявіў пра неабходнасць дастатковых гарантый бяспекі, якімі ў Вашынгтоне лічаць ужо сам факт прысутнасці амерыканскага бізнесу ва Украіне.

У канцы лютага Расія таксама выказала гатоўнасць супрацоўнічаць з ЗША ў сферы здабычы рэдказямельных металаў.