Кіраўнік Мінпрыроды справаздачыўся аб “мазгавым штурме” для пошуку рэдказямельных элементаў па даручэнні Лукашэнкі

5 сакавіка, Позірк. “Мазгавы штурм” з мэтай “выпрацоўкі канкрэтных прапаноў” па пошуку ў Беларусі рэдказямельных элементаў праведзены ў Міністэрстве прыродных рэсурсаў і аховы навакольнага асяроддзя, паведаміў 5 сакавіка кіраўнік ведамства Сяргей Масляк.

Паводле слоў чыноўніка, якога цытуе прэс-служба ведамства, “выяўленнем перспектыўных плошчаў” з пакладамі згаданых выкапняў Мінпрыроды займаецца з удзелам падведамных арганізацый — дзяржаўных прадпрыемстваў “НПЦ па геалогіі” і “Белдзяржгеацэнтр”. Праца вядзецца ў рамках выканання адпаведнага даручэння Аляксандра Лукашэнкі, адзначыў Масляк.

“Пэўныя перспектывы выяўлення названых элементаў і металаў мы звязваем з пародамі крышталічнага падмурка ў межах Жыткавіцкага раёна Гомельскай вобласці, а таксама Шчучынскага і Гродзенскага раёнаў Гродзенскай вобласці”, — заявіў міністр.

“Спецыялістамі праводзіцца дэталёвае вывучэнне наяўнага фондавага геалагічнага матэрыялу для наступнага вызначэння складу і аб’ёму неабходных работ у мэтах наступнай падрыхтоўкі мерапрыемстваў у праект фарміруемай у цяперашні час Мінпрыроды дзяржаўнай праграмы “Нетры” на 2026–2030 гады”, — дадаў Масляк.

Праект новай дзяржпраграмы, паводле яго слоў, плануецца разгледзець “па выніках першага квартала 2025 года на пасяджэнні савета па развіцці геолагаразведачнай галіны і нетракарыстанні пры Мінпрыроды”.

Шукаць рэдказямельныя матэрыялы Лукашэнка даручыў Мінпрыроды на нарадзе па кадравых пытаннях 4 сакавіка.

“Надзвычай актуальная тэма, — сказаў ён. — Кажуць, што ў нас у адвалах ёсць рэдказямельныя мінералы. Трэба выведаць і астатняе: і хімія, і нафта, і газ, і іншае. Я ставіў адпаведную задачу перад адпаведным міністрам”.

Лукашэнка выказаў меркаванне, што геолагавыведка ў краіне развіта недастаткова: “Рэдказямельныя металы” вымаўляе толькі Трамп у Злучаных Штатах Амерыкі. Вы пакуль над гэтым не задумваліся. Іх шмат не бывае ў зямлі. Можа, у нас не менш, чым у іншых? <…> Трэба капаць, трэба глядзець, што ёсць у нас у зямлі”.

28 лютага Кіеў і Вашынгтон збіраліся падпісаць амерыкана-ўкраінскае пагадненне аб карысных выкапнях як частку прапанаванай новай амерыканскай адміністрацыяй здзелкі, прызначанай для завяршэння вайны Расіі супраць Украіны. Падпісанне дакумента сарвалася. Бакі разышліся ў поглядах на вайну (перамовы па рашэнні Трампа былі адкрытымі, у прысутнасці СМІ). Акрамя таго, прэзідэнт Украіны Уладзімір Зяленскі заявіў пра неабходнасць дастатковых гарантый бяспекі, якімі ў Вашынгтоне лічаць ужо сам факт прысутнасці амерыканскага бізнесу ва Украіне.

У канцы лютага Расія таксама выказала гатоўнасць супрацоўнічаць з ЗША ў сферы здабычы рэдказямельных металаў.