Галоўчанка заявіў аб гатоўнасці Беларусі да пашырэння ваеннага супрацоўніцтва з М’янмай
7 сакавіка, Позірк. Супрацоўніцтва Беларусі і М’янмы ў сферы абароны і бяспекі мае “трывалую і даўнюю гісторыю”, заявіў прэм’ер-міністр Раман Галоўчанка 7 сакавіка ў Мінску на сустрэчы са старшынёй Дзяржаўнага адміністрацыйнага савета, прэм’ер-міністрам гэтай азіяцкай дзяржавы Мін Аун Хлайнам.
“Я ўпэўнены, што вы вельмі глыбока валодаеце гэтай тэмай, таму не буду спыняцца на ёй, толькі падкрэслю, што мы гатовы да інтэнсіфікацыі ўзаемадзеяння ў гэтай сферы настолькі, наколькі гэта патрэбна для М’янмы”, — падкрэсліў прэм’ер (паводле відэафрагмента ў тэлеграм-канале ўрада).
У ліку “флагманскіх” праектаў беларуска-м’янманскіх адносін Галоўчанка згадаў зборачную вытворчасць аптычных вырабаў. Іншымі такімі праектамі ён лічыць зборку беларускіх трактароў, праектаванне і будаўніцтва жывёлагадоўчых аб’ектаў, сумесную фармацэўтычную вытворчасць.
Кіраўнік урада прапанаваў прапрацаваць пытанне паставак у М’янму беларускіх прадуктаў харчавання і фармацэўтычнай прадукцыі, у зваротным кірунку — рысу, каўчуку і медзі.
7 сакавіка Аляксандр Лукашэнка на сустрэчы з Мін Аун Хлайнам заявіў, што краіны “выбудавалі фундамент будучых адносін”. “І сёння нам трэба рухацца наперад, далей. Закрытых тэм у адносінах паміж Беларуссю і М’янмай на сённяшні дзень няма”.
5 сакавіка м’янманскі прэм’ер наведваў Расію. У Крамлі ён сустракаўся з прэзідэнтам РФ Уладзімірам Пуціным.
10 студзеня паведамлялася, што на перамовах у Нэйп’іда кіраўнік МЗС Беларусі Максім Рыжанкоў і намеснік прэм’ера — саюзны міністр замежных спраў М’янмы Тан Свэ “канстатавалі падобныя пазіцыі па шэрагу міжнародных пытанняў”. Заяўлялася, што на сустрэчы чыноўнікі абмеркавалі “бягучы стан двухбаковых адносін, вызначылі напрамкі супрацоўніцтва ў палітычнай, эканамічнай і гуманітарнай сферах”, а таксама “акрэслілі графік кантактаў на бягучы год”.
4 студзеня Лукашэнка заявіў аб зацікаўленасці ў тым, каб хутка рэалізаваць “значны патэнцыял” супрацоўніцтва з М’янмай “ва ўсіх галінах”. Ён у чарговы раз запрасіў Мін Аун Хлайна ў Беларусь, каб “абмеркаваць прыярытэтныя пытанні двухбаковага і міжнароднага парадку дня”.
2 лютага 2021 года ў М’янме пад кіраўніцтвам галоўнакамандуючага ўзброенымі сіламі старэйшага генерала Мін Аун Хлайна быў здзейснены ваенны пераварот, які выклікаў масавыя пратэсты, якія перараслі ў грамадзянскую вайну.
Паводле ацэнак арганізацыі ACLED (Аrmed Conflict Location & Event Data) на 24 чэрвеня 2022 г., у выніку гвалту пасля перавароту агулам было забіта каля 21 тыс. чалавек.
Дыпламатычныя адносіны паміж краінамі ўстаноўлены 22 верасня 1999 года. Інтарэсы Беларусі ў М’янме прадстаўляе беларускае пасольства ў В’етнаме, інтарэсы м’янманскага боку — пасольства ў Расіі. З верасня 2023 года ў Мінску дзейнічае генеральнае консульства М’янмы.
Тавараабарот у 2021 годзе (больш позняя інфармацыя не прыводзіцца), паводле звестак Міністэрства замежных спраў, склаў 8,2 млн долараў (экспарт — 5,3 млн, імпарт — 2,9 млн, сальда — 2,4 млн).
Паводле інфармацыі дзяржСМІ, аб’ём узаемнага гандлю Беларусі і М’янмы па выніках 2024 года склаў 34,6 млн. долараў, з якіх на беларускі экспарт прыпала 22,7 млн. долараў.
Па выніках 2024 года Беларусь дзеліць 192–194-е месцы ў свеце разам з Азербайджанам і М’янмай па ўзроўні палітычных і грамадзянскіх свабод, вынікае з даклада Freedom in the World міжнароднай няўрадавай арганізацыі Freedom House, апублікаванага 26 лютага.
Усяго ў рэйтынгу прадстаўлена 207 дзяржаў, у тым ліку часткова прызнаныя, і тэрыторыі, у тым ліку акупаваныя. У прыватнасці, апошняе месца займаюць “акупаваныя Расіяй украінскія тэрыторыі”.