На фоне змены кіраўніцтва ўрада і Нацбанка рубель умацаваўся да долара, еўра і юаня

10 сакавіка, Позірк. Амерыканская, агульная еўрапейская, а таксама кітайская валюты патаннелі на таргах Беларускай валютна-фондавай біржы 10 сакавіка 2025 года.

Курс долара знізіўся да 3,2037 рубля (-0,27%; -0,0088), юаня — да 4,3598 за 10 (-0,37%; -0,0164), еўра — да 3,45 рубля (-0,29%; -0,01).

Расійскі рубель падаражэў да 3,5781 за 100 (+0,15%; +0,0053).

Раней у гэты дзень Аляксандр Лукашэнка зрабіў кадравыя перастаноўкі ва ўрадзе і Нацыянальным банку. Прэм’ер-міністрам прызначаны Аляксандр Турчын, ранейшы старшыня Савета міністраў Раман Галоўчанка стаў старшынёй праўлення Нацбанка.

На мінулым працоўным тыдні (3–7 сакавіка) долар падаражэў на 0,28% (з 3,2034 да 3,2125), еўра — на 4,32% (з 3,3166 да 3,4600), юань — на 0,87% (з 4,3386 да 4,3762 за 10); расійскі рубель патаннеў на 1,03% (з 3,6099 да 3,5728 за 100).

На 8,54% (з 3,4735 да 3,1770 рублі) знізіўся афіцыйны курс долара ў Беларусі за студзень — люты 2025 года. Гэта другі паказчык на тэрыторыі былога СССР, сведчыць праведзены “Позіркам“ параўнальны аналіз каціровак цэнтрабанкаў на 31 снежня 2024 года і 28 лютага 2025-га (па выніках студзеня таксама другое месца, -1,73%).

Аналіз таксама паказаў, што афіцыйны курс долара ў Беларусі ў 2024 годзе вырас на 9,32% (з 3,1775 да 3,4735 рублі). Гэта чацвёрты паказчык на тэрыторыі былога СССР.

У 2023 годзе ў Беларусі было другое месца паводле росту афіцыйнага курсу долара (+16,12%), у 2022-м — трэцяе (+7,39%), у 2021-м — чацвёртае сярод краін на тэрыторыі былога СССР, дзе долар патаннеў (-1,19%), у 2020-м — першае месца.