Расія пры падтрымцы Беларусі з’яўляецца “самай значнай прамой і ўскоснай пагрозай ЕС” — рэзалюцыя Еўрапарламента
12 сакавіка, Позірк. Расія пры падтрымцы сваіх саюзнікаў Беларусі, Кітая, КНДР і Ірана з’яўляецца “самай значнай прамой і ўскоснай пагрозай ЕС”, гаворыцца ў прынятай 12 сакавіка рэзалюцыі Еўрапарламента (ЕП).
Поўны тэкст рэзалюцыі пакуль не апублікаваны. Вытрымкі з дакумента апублікавала прэс-служба ЕП.
У паведамленні адзначаецца, што Еўрапарламент заклікае ЕС дзейнічаць “у тэрміновым парадку” і забяспечыць уласную бяспеку праз “умацаванне стасункаў з партнёрамі-аднадумцамі і значнае памяншэнне залежнасці ад краін”, якія не ўваходзяць у саюз.
У дакуменце гаворыцца, што Еўрасаюз “перажывае пераломны момант” і для дасягнення міру і стабільнасці ў Еўропе “павінен падтрымаць Украіну і сам стаць больш устойлівым”.
Еўропа, як заяўляецца, “сутыкаецца з самай сур’ёзнай ваеннай пагрозай сваёй тэрытарыяльнай цэласнасці з часоў заканчэння халоднай вайны”. У рэзалюцыі ўтрымліваецца заклік да дзяржаў ЕС, міжнародных партнёраў і саюзнікаў па НАТО “зняць усе абмежаванні на выкарыстанне заходніх сістэм узбраенняў, пастаўленых Украіне, супраць вайсковых цэляў на расійскай тэрыторыі”.
Нядаўнія дзеянні і заявы адміністрацыі амерыканскага прэзідэнта Дональда Трампа “ўзмацнілі асцярогі з нагоды будучай пазіцыі ЗША ў дачыненні да Расіі, НАТО і еўрапейскай бяспекі”, Еўрапарламент таксама “рашуча асуджае пагрозы ЗША ў адрас Грэнландыі”, адзначаецца ў дакуменце.
На гэтым фоне падкрэсліваецца, што абаронныя намаганні ЕС “не могуць заставацца абмежаванымі па памеры, фрагментарнымі па ахопе і працяглымі па часе”. Еўрапарламент “патрабуе нарошчвання намаганняў у вайсковай галіне, а таксама ў прамысловым, тэхналагічным і выведвальным сектарах”.
У тэксце гаворыцца, што ЕС павінен даць магчымасць сваёй адміністрацыі “значна хутчэй праходзіць усе працэдуры” ў выпадку вайны або іншых маштабных крызісаў бяспекі. Падкрэсліваючы важнасць супрацоўніцтва паміж ЕС і НАТО, еўрадэпутаты заклікаюць да стварэння “цалкам дзеяздольнай еўрапейскай часткі ў НАТО”, здольнай “дзейнічаць аўтаномна, калі гэта неабходна”.
ЕС павінен прыняць рашэнне аб “адзіным і выразным доўгатэрміновым бачанні еўрапейскай абароннай прамысловасці”, працэс прыняцця рашэнняў па еўрапейскай абароне павінен стаць менш складаным, звяртаюць увагу аўтары дакумента.
ЕП папярэджвае, што без істотнага павелічэння інвестыцый “мэты Еўрасаюзу ў галіне бяспекі і абароны не будуць дасягнутыя ні ў дачыненні да вайсковай падтрымкі Украіны, ні ў дачыненні да павышэння агульнаеўрапейскай бяспекі”.
Дэпутаты Еўрапарламента заяўляюць, што “неадкладныя патрэбы не могуць чакаць наступнай шматгадовай фінансавай рамачнай праграмы” і просяць знайсці “інавацыйныя рашэнні для пошуку дадатковага фінансавання без затрымак”, такія як “сістэма еўрапейскіх абаронных аблігацый для фінансавання буйнамаштабных ваенных інвестыцый”.
Рэзалюцыя прынятая 419 галасамі, 204 еўрадэпутаты прагаласавалі “супраць”, 46 устрымаліся.
Паводле інфармацыі польскіх СМІ, у дакуменце згадваецца праграмы “Усходні шчыт” і “Балтыйская лінія абароны”, якія “павінны стаць флагманскімі праектамі ЕС для падтрымкі стрымлівання і пераадолення патэнцыйных пагроз з усходу”. Як паведамляе выданне Оnet, “абарона сухапутных, паветраных і марскіх межаў ЕС спрыяе бяспецы ЕС у цэлым і яго ўсходняй мяжы ў прыватнасці”.
Польская нацыянальная праграма стрымлівання і абароны “Усходні шчыт” прадугледжвае будаўніцтва фізічных умацаванняў, натуральных перашкод на мясцовасці, сістэм абароны ад дронаў і ўзмацненне сістэм выяўлення. Акрамя бетонных “вожыкаў” або процітанкавых равоў, у ёй выкарыстоўваюцца элементы навакольнага асяроддзя, такія як балоты або лясы, а таксама высокатэхналагічныя сістэмы.
Прэм’ер-міністр Польшчы Дональд Туск 6 сакавіка заявіў, што Еўропа павінна “цалкам засцерагчы свае межы”, асабліва з Расіяй і Беларуссю.
Польскі прэм’ер назваў прыярытэтам абаронны праект “Усходні шчыт”, які будзе абараняць краіны ЕС ад РФ і Беларусі. “Гэта не толькі польскі праект, у ім таксама ўдзельнічаюць фіны і краіны Балтыі”, — канстатаваў палітык.
Умацаванне абароны паветранай прасторы ЕС, абарона Балтыйскага мора і кіберпрасторы таксама, паводле слоў Туска, з’яўляюцца неабходнасцю.
У канцы лютага стала вядома, што Латвія, Літва, Польшча і Эстонія накіравалі ў Еўрапейскую камісію дакумент, у якім выкладаюць дэталі стварэння адзінай лініі абароны на мяжы з Беларуссю і Расіяй, а таксама ўказваюць кошт некалькіх агульнакантынентальных абаронных праектаў.
Адзначалася, што дакумент закліканы паўплываць на распрацоўку т.зв. “Белай кнігі” пра будучыню абароны блока, у якой, як чакаецца, будуць вызначаныя асноўныя абаронныя праекты, куды еўрапейцы павінны інвеставаць “на карысць усіх краін ЕС”.