У Германіі затрыманая грамадзянка Беларусі, яе абвінавацілі ў арганізацыі экспарту ў РФ падсанкцыйных аўтамабіляў прэміум-класа

12 сакавіка, Позірк. Аб затрыманні ў Германіі 46-гадовай грамадзянкі Беларусі паведамляе партал presseportal.de са спасылкай на Мытную службу Берліна-Брандэнбурга.

Яе абвінавачваюць у парушэнні санкцый Еўрасаюза супраць Расіі.

Адзначаецца, што па месцы жыхарства жанчыны праведзены ператрус, у яе канфіскаваныя чатыры дарагія аўтамабілі і два прычэпы-рэфрыжэратары, яшчэ адзін аўтамабіль арыштаваны ў якасці рэчавага доказу. Таксама канфіскаваныя дзелавыя дакументы і носьбіты інфармацыі.

Паведамляецца, што з 5 красавіка 2022 года беларуска разам з двума саўдзельнікамі экспартавала ў Расію 186 дарагіх аўтамабіляў пад выглядам паставак у Беларусь, Кыргызстан, Таджыкістан і Узбекістан. Такім чынам працавала схема абыходу еўрапейскіх санкцый супраць РФ у дачыненні да прадметаў раскошы.

Паводле папярэдніх звестак, усяго затрыманая вывезла ў Расію 192 аўтамабілі агульным коштам 21 млн 413 тысяч 161,31 еўра.

У публікацыі гаворыцца, што грамадзянку Беларусі абвінавачваюць у некалькіх злачынствах, звязаных з парушэннем закона аб знешнім гандлі і плацяжах.

“Палова Еўропы дагэтуль гандлюе з Расіяй і Беларуссю, многія кампаніі, у тым ліку польскія, паспяхова абыходзяць санкцыі. Таму што чамусьці ніхто не зацікаўлены ў строгім забеспячэнні іх выканання”, — заявіў 13 сакавіка 2024 года прэм’ер-міністр Польшчы Дональд Туск у інтэрв’ю кампаніі TVN24. Санкцыі супраць Расіі, паводле яго слоў, “павінны перастаць быць фіктыўнымі”.

Еўрасаюз, ЗША і іншыя краіны пачалі актыўна ўводзіць санкцыі супраць Расіі пасля яе поўнамаштабнага ўварвання ва Украіну 24 лютага 2022 года. За падтрымку расійскай вайсковай агрэсіі абмежаванням падвергнулася і Беларусь.