Савет ЕС выпрацаваў пазіцыю па пытанні абмежавання паставак сельскагаспадарчай прадукцыі з Беларусі і Расіі
14 сакавіка, Позірк. Савет Еўрапейскага саюза выпрацаваў пазіцыю на маючых адбыцца перамовах з Еўрапейскім парламентам па рэгламенце, які ўвядзе мыты на сельскагаспадарчую прадукцыю з Расіі і Беларусі, а таксама на некаторыя азотныя ўгнаенні.
Савет ЕС чакае, што мыты скароцяць даходы ад расійскага экспарту, тым самым абмяжоўваючы магчымасці Расіі фінансаваць сваю вайну супраць Украіны.
Адзначаецца, што прадукцыя, на якую распаўсюджваюцца новыя мыты, складае 15% усяго сельскагаспадарчага імпарту з Расіі (у 2023 годзе). Сцвярджаецца, што пасля пачатку дзеяння новых мытаў увесь сельскагаспадарчы імпарт з РФ будзе абкладацца мытамі ЕС. Звесткі па беларускім імпарце не прыводзяцца.
Савет ЕС сцвярджае, што новыя тарыфы накіраваныя на зніжэнне залежнасці ад Расіі і Беларусі, стымуляванне ўнутранай вытворчасці і падтрымку індустрыі ўгнаенняў ЕС, гарантуючы пры гэтым, што Расія не атрымае камерцыйнай выгады ад працягнення экспарту ў саюз. Яны таксама дазволяць дыверсіфікаваць пастаўкі з трэціх краін, каб стварыць стабільныя пастаўкі ўгнаенняў і, што асабліва важна, забяспечыць даступнасць угнаенняў для фермераў ЕС. Павышэнне тарыфаў на ўгнаенні будзе адбывацца паступова, на працягу пераходнага перыяду працягласцю тры гады.
Прапанова таксама ўключае меры па змякчэнні наступстваў для фермераў ЕС у выпадку істотнага росту цэн на ўгнаенні.
Паведамляецца, што пасля таго, як Еўрапейскі парламент (ЕП) аформіць сваю пазіцыю, абедзве інстытуцыі (ЕП і Савет ЕС) павінны будуць узгадніць агульны тэкст, пасля чаго апошняя афіцыйна прыме рэгламент кваліфікаванай большасцю.
Пра ухваленне згаданага рашэння Еўрапейскай камісіяй паведамлялася 29 студзеня.
Тады адзначалася, што “сельскагаспадарчая прадукцыя, на якую распаўсюджваюцца новыя тарыфы, складае 15% сельскагаспадарчага імпарту з Расіі і Беларусі”.
Адзначалася, што тарыфы не будуць распаўсюджвацца на транзіт сельскагаспадарчай прадукцыі і ўгнаенняў з Расіі і Беларусі ў трэція краіны “згодна з абавязацельствамі ЕС па забеспячэнні харчовай бяспекі”.
1 ліпеня 2024 года ЕС падвысіў тарыфы на імпарт некаторых відаў сельскагаспадарчай прадукцыі з Беларусі і Расіі. Яны, у прыватнасці, закранаюць збожжавыя, алейныя культуры і прадукты іх перапрацоўкі, а таксама гранулы бурачных жамерынаў і сушонага гароху.
7 кастрычніка таго ж года паведамлялася, што Беларусь па выніках першага паўгоддзя знаходзілася на трэцім месцы па аб’ёме паставак у Польшчу азотных угнаенняў, саступаючы Расіі і Германіі, але апярэджваючы Літву, Алжыр, Венгрыю, Нідэрланды, Казахстан і Нігерыю.