Восем краін далучылася да санкцый ЕС супраць “Інтэграла”

19 сакавіка, Позірк. Восем дзяржаў далучылася да прынятага 24 лютага санкцыйнага пакета Еўрасаюза ў дачыненні да Беларусі, паведаміў 18 сакавіка Савет ЕС.

Гэта зрабілі Албанія, Боснія і Герцагавіна, Ісландыя, Ліхтэнштэйн, Нарвегія, Паўночная Македонія, Украіна і Чарнагорыя.

Новыя санкцыі былі ўведзеныя “з прычыны сітуацыі ў Беларусі і ўдзелу Беларусі ў расійскай агрэсіі супраць Украіны”. Яны былі прымеркаваныя да трэцяй гадавіны расійскага ўварвання на ўкраінскую тэрыторыю.

Дзяржавы, якія далучыліся, абавязаліся “забяспечыць адпаведнасць сваёй нацыянальнай палітыкі сапраўднаму рашэнню Савета ЕС [ад 24 лютага]”.

“Еўрапейскі саюз прымае да ведама гэтае абавязацельства і вітае яго”, — гаворыцца ў паведамленні.

Новыя санкцыі ЕС былі ўведзеныя ў дачыненні да беларускага вытворцы паўправаднікоў, інтэгральных схем і іншых высокатэхналагічных тавараў ААТ “Інтэграл”. Гэта было зроблена як рэакцыя на крокі, якія “падрываюць або пагражаюць тэрытарыяльнай цэласнасці, суверэнітэту і незалежнасці Украіны”, гаварылася ў афіцыйным часопісе ЕС.

Адзначалася, што прадукцыя “Інтэграла“ закупляецца расійскімі арганізацыямі, якія ўдзельнічаюць у агрэсіўнай вайне Расіі супраць Украіны, “і была знойдзеная на полі бою“. Падобныя заказы “з’яўляюцца буйнымі і складаюць пераважную частку экспарту кампаніі“.

“Паўправаднікі жыццёва неабходныя Расіі для вядзення баявых дзеянняў, і Расія ўжо інвеставала ў ААТ “Інтэграл“ 350 млн долараў ЗША. Такім чынам, ААТ “Інтэграл” падтрымлівае дзеянні, што падрываюць і пагражаюць тэрытарыяльнай цэласнасці, суверэнітэту і незалежнасці Украіны, а таксама падтрымлівае і атрымлівае выгаду ад урада Расійскай Федэрацыі, які нясе адказнасць за анэксію Крыма і дэстабілізацыю Украіны“, — падкрэслівалася ў публікацыі.

У лютым 2022 года за падтрымку вайны санкцыі супраць “Інтэграла“ ўвяло Міністэрства фінансаў ЗША, у сакавіку таго ж года — Вялікабрытанія, крыху пазней — Японія.

У кастрычніку 2022 года прэзідэнт Украіны Уладзімір Зяленскі сваім указам зацвердзіў санкцыйныя спісы, куды было ўключана блізу 4 тыс. фізічных і юрыдычных асоб з Беларусі і Расіі. Сярод іх быў “Інтэграл“.

14 лютага 2025 года Аляксандр Лукашэнка пры наведванні “Інтэграла“ заявіў, што “роля электронікі для будучыні Беларусі, у тым ліку для Беларусі і Расіі, вельмі важная“.

Аб’яднанне былых сілавікоў BelPol у студзені апублікавала расследаванне, згодна з якім “Інтэграл“ з’яўляецца адным з прадпрыемстваў, уцягнутых у масавую вытворчасць снарадаў для расійскага войска.

Беларускі расследвальніцкі цэнтр у канцы студзеня таксама паведаміў, што “Інтэграл” абыходзіць санкцыі і дапамагае вайсковай агрэсіі РФ.