20 сакавіка ў Гомельскай вобласці ўключаць электрасірэны для праверкі — МНС

19 сакавіка, Позірк. Штомесячная тэхнічная праверка электрасірэннага абсталявання пройдзе 20 сакавіка на тэрыторыі Гомельскай вобласці, будуць уключаныя электрасірэны, паведамляе Міністэрства па надзвычайных сітуацыях.

“Захоўвайце спакой, ніякіх дзеянняў не патрабуецца”, — заклікае МНС.

У паветраную прастору Гомельскай вобласці рэгулярна ўрываюцца беспілотныя лятальныя апараты, якія, як мяркуецца, належаць Расіі, якая атакуе аб’екты на тэрыторыі Украіны. Зафіксавана некалькі выпадкаў падзення БПЛА на будынкі.

Маштабнае адключэнне цеплазабеспячэння ў Мазыры (Гомельская вобласць) 27-28 лютага было звязана з падзеннем расійскага беспілотніка, паведамляў са спасылкай на свае крыніцы рэгіянальны сайт “Флагшток“.

Сцвярджалася, што была пашкоджана адна з высакавольтных ліній электраперадачы: “З-за некарэктнага спрацоўвання аўтаматычнай сістэмы абароны аварыйна адключыліся і суседнія высакавольтныя лініі, цалкам абясточыўшы ЦЭЦ. Пасля некалькіх спробаў, станцыя была адноўленая, аднак паўстала новая бяда — пуск цепланосбіта прывёў да гідраўдару ў сістэме трубаправодаў“.

У выніку “ў некалькіх месцах быў пашкоджаны магістральны трубаправод дыяметрам 700 міліметраў”.

Раней “Флагшток” паведамляў, што невядомы лятальны апарат ноччу 27 лютага ўпаў на гаспадарчую пабудову ў Гомельскім раёне і выбухнуў, здарыўся пажар.

Летась 4 кастрычніка Аляксандр Лукашэнка прызнаў факты парушэння мяжы баявымі беспілотнікамі і заявіў, што беларускі бок іх збівае незалежна ад таго, украінскія яны ці расійскія.

Афіцыйныя ведамствы не каментуюць залёт расійскіх дронаў у Беларусь.

Мінск падтрымлівае Маскву ў развязанай ёю поўнамаштабнай вайне супраць Украіны.

З пачатку вайны Расеі супраць Украіны праверкі сістэмы абвесткі сістэматычна праходзяць як мінімум у Літве, Польшчы, Чэхіі. Для гэтага выкарыстоўваюцца рэпрадуктары на вуліцах, праз якія перадаецца паведамленне і гучыць сірэна.

У Беларусі планавая праверка сістэмы абвесткі прайшла 13 сакавіка. У эфіры FM-радыёстанцый транслявалася паведамленне: “Увага! Праводзіцца тэхнічная праверка сістэмы абвесткі. Тэхнічная праверка завершаная”.

Летась штогадовая праверка аўтаматызаванай сістэмы цэнтралізаванай абвесткі (АСЦА) адбылася 21 сакавіка пры ўдзеле “суб’ектаў сістэмы абвесткі“ — Белтэлерадыёкампаніі, тэлеканалаў АНТ і СТБ, кампаніі “Белтэлекам“.

АСЦА прызначаная для таго, каб інфармаваць жыхароў, органы ўлады, а таксама структуры сістэмы грамадзянскай абароны, папярэджання і ліквідацыі НС пра пагрозу або ўзнікненне надзвычайных сітуацый прыроднага і тэхнагеннага характару, ходзе іх ліквідацыі, правілах паводзін насельніцтва ў гэтых умовах.

Звычайна сістэма запускае перадачу сігналу “Увага ўсім!” з дапамогай электрасірэн і сістэм гучнагаварыцельнай сувязі; маўленчай інфармацыі па гучнагаварыцелях; перахапляе сігналы тэле – і радыёканалаў (FM), якія вяшчаюць па ўсёй краіне, у абласных або раённых цэнтрах; уключае інфармацыйны бягучы радок у эфіры рэспубліканскіх тэлеканалаў; ініцыюе рассылку кароткіх паведамленняў з папярэджаннем абанентам сотавай сувязі.