Кіраўнік Канстытуцыйнага суда Міклашэвіч лічыць, што ў Беларусі высокі ўзровень дэмакратыі
21 сакавіка, Позірк. “Сёння з усімі падставамі можна казаць пра тое, што мы дасягнулі дастаткова высокага ўзроўню фарміравання дэмакратычнай дзяржавы”, — заявіў старшыня Канстытуцыйнага суда Пётр Міклашэвіч у праграме “Актуальнае інтэрв’ю” на тэлеканале “Беларусь 1” 20 сакавіка.
Канстытуцыйныя правы чалавека і грамадзяніна ў краіне “адпавядаюць усім міжнародным актам, прынятым на ўзроўні ААН”, дадаў ён.
“Але мала іх запісаць <…>, неабходна забяспечыць іх рэальную рэалізацыю. Так я з поўнай упэўненасцю магу сёння сцвярджаць, што, сапраўды, ў нашай краіне прымаюцца неабходныя захады, каб правы і свабоды чалавека насамрэч рэалізоўваліся”, — сказаў кіраўнік КС.
Беларускае выбарчае заканадаўства, паводле Міклашэвіча, “адпавядае прынцыпам дэмакратычным”, а на сёмы выбарах прэзідэнта 26 студзеня, лічыць ён, грамадзяне “свабодна выказалі сваё волевыяўленне і зрабілі правільны выбар”.
“Таму сёння <…> няма ніякіх падстаў ставіць пад сумнеў легітымнасць выбараў, што адбыліся ў нашай краіне”, — падсумаваў судовы чыноўнік.
70-гадовы Міклашэвіч ачольвае Канстытуцыйны суд з 2008 года. Да гэтага ён займаў пасаду генеральнага пракурора.
КС у сістэме ўлады, выбудаванай Аляксандрам Лукашэнкам, цалкам яму падкантрольны.
На апошняй электаральнай працэдуры за Лукашэнку, паводле звестак Цэнтрвыбаркама, прагаласавала 86,82% выбаршчыкаў.
Яна прайшла пад поўным кантролем уладаў і на фоне беспрэцэдэнтнага ўзроўню рэпрэсій, якія працягваюцца з 2020 года — папярэдняга выбарчага перыяду.
Пра тое, што насельніцтва Беларусі неабходна “вучыць дэмакратыі”, заявіла першая намесніца кіраўніка Адміністрацыі прэзідэнта Наталля Пяткевіч у верасні мінулага года.
Чыноўніца назвала краіны — удзельніцы СНД “дзяржавамі з маладой дэмакратыяй, што фарміруецца”, якія пры гэтым “ужо наважыліся кінуць выклік сусветным гегемонам і не прызнаць за аксіёму існуючыя стандарты і ўмовы толькі таму, што яны кімсьці калісьці былі ўстаноўлены і прызнаны абавязковымі для выканання ва ўсім свеце”.
Заявы прагучалі на фоне чарговага звароту прапаганды да тэматыцы дыктатуры ў Беларусі і працягу фарміравання ёю культу асобы Лукашэнкі.
У прыватнасці, 17 верасня да Дня народнага адзінства была прэзентавана прысвечаная яму песня “Балада пра дыктатара” на вершы малдаўскага паэта Паўла Дуганава і музыку кіраўніка праўладнай “Арт-групы “Беларусы” Валерыя Шмата.
Прадстаўляючы ў той дзень песню на “патрыятычным форуме” ў Мінску, прэс-сакратар Лукашэнкі Наталля Эйсмант заявіла, што ў ёй няма “ніякага правадырства”, але гэта “шчыры падарунак” яму ад тых, хто з ім працуе.
Эйсмант вядомая, сярод іншага, сваім выказваннем пяцігадовай даўнасці: “Дыктатура — гэта ўжо наш брэнд”.
“Мне здаецца, не сёння дык заўтра ў свеце можа ўзнікнуць запыт на дыктатуру. Бо за дыктатурай у нашым сённяшнім разуменні мы бачым у першую чаргу парадак, дысцыпліну і абсалютна нармальнае, спакойнае жыццё”, — заявіла яна ў эфіры тэлеканала АНТ у сакавіку 2019 года.