Галоўчанка: Банкі абавязаныя прымаць усе плацежаздольныя доларавыя купюры незалежна ад года выпуску

28 сакавіка, Позірк. У палітыцы валютна-абменных аперацый з фізічнымі асобамі ніякіх абмежаванняў або зменаў “не ўводзілася, не ўводзіцца і ўводзіцца не будзе”, заявіў журналістам 28 сакавіка старшыня праўлення Нацыянальнага банка Раман Галоўчанка.

“Мы не маем ніякіх інструкцый або абмежаванняў у прыёме тых ці іншых [доларавых] купюр, звязаных з іх годам выпуску”, — заявіў чыноўнік (на падставе відэафрагмента, апублікаванага прэс-службай рэгулятара).

Паводле яго слоў, цяпер у Беларусі ходзяць розныя купюры амерыканскай валюты, і банкі “абавязаныя прымаць і прымаюць купюры любога ўзору, калі яны з’яўляюцца плацежаздольнымі, гэта значыць валодаюць прыкметамі плацежаздольнасці”.

У 2023 годзе, нагадаў Галоўчанка, банкі, што працуюць у краіне, пагадзіліся выкарыстоўваць адзіны пералік прыкмет плацежнасці банкнот у замежнай валюце: “Гэта пагадненне было скіраванае на тое, каб не толькі ўніфікаваць патрабаванні, але і зрабіць іх больш “лайтовымі” (аблегчанымі. — “Позірк”.). Каб яны не былі залішнімі”.

Сітуацыя з пашкоджанымі купюрамі змянілася пасля ўвядзення санкцый у дачыненні да банкаўскай сістэмы. Такую выснову можна зрабіць са сцвярджэння Галоўчанкі пра тое, што “раней гэтай праблемы наогул не было ў сувязі з тым, што банкі маглі праводзіць абмен такой валюты за мяжой на новыя купюры”. “Цяпер гэта з вядомых прычын ускладнена”, — сказаў чыноўнік.

Кіраўнік Нацбанка нагадаў, што “Беларусбанк” “нядаўна адкрыў аперацыі па прыёме пашкоджаных купюр на “інкаса”, гэта значыць абмен на непашкоджаныя, але, зразумела, гэта паслуга платная і маецца пэўная камісія”.

Паводле яго слоў, рэгулятар “вельмі старанна адсочвае гэтую сітуацыю, літаральна ў штодзённым рэжыме, дае адпаведныя ўстаноўкі банкам”. “Працуе кол-цэнтр, у які можна накіроўваць пытанні і магчымыя скаргі. Але ў цэлым праблема не мае сістэмнага характару”, — заявіў Галоўчанка.

У адпаведнасці са згаданым чыноўнікам пагадненнем банкі маюць права адмовіць у абмене, калі на доларах, якія здае кліент, маюцца малюнкі і пэўныя надпісы, у тым ліку нецэнзурныя; купюры вільготныя, ліпкія, разарваныя, а пасля заклееныя, змянілі афарбоўку, пашкоджаныя агнём, маюць сляды сцірання малюнкаў або вытворчы брак.

Стан купюры ацэньвае супрацоўнік касы. Ён жа на падставе зацверджанага пераліку вырашае, прыняць купюру або вярнуць яе кліенту.

Раней “Позірк” паведамляў, што “Беларусбанк” пашырыў пералік валют, якія прымаюцца на падставе аперацыі “інкаса”. Падраздзяленні банка прымаюць пашкоджаныя банкноты долараў, еўра і расійскіх рублёў на “інкаса” з камісіяй у памеры 5% сумы валюты ў эквіваленце (мінімум 25 рублёў). Дадаткова кліент кампенсуе суму выдаткаў, панесеных банкам у рамках дагаворных стасункаў з банкамі-кантрагентамі.