На нелегальнай тытунёвай фабрыцы ў Польшчы паліцыя затрымала дваіх грамадзян Беларусі
18 верасня, Позірк. Двое грамадзян Беларусі, чацвёра ўкраінцаў і адзін паляк былі затрыманыя ў першай палове верасня пры ліквідацыі нелегальнай тытунёвай фабрыкі ў Шчэцінскім павеце (Заходне-Паморскае ваяводства), паведамляе Цэнтральнае бюро расследаванняў (ЦБР) паліцыі Польшчы.
Паводле інфармацыі ведамства, абвінавачанне ва “ўдзеле ў арганізаванай злачыннай групе” і “здзяйсненні падатковых злачынстваў” выстаўленае шасці з сямі затрыманых, іх нацыянальнасці не ўдакладняюцца. На падставе хадайніцтва пракурора суд накіраваў іх пад арышт.
У ходзе сумеснай аперацыі ЦБР, Цэхануўскага аддзела крымінальнага вышуку ваяводскага ўпраўлення паліцыі ў Радоме і Мазавецкай мытна-падатковай інспекцыі былі “выяўлены і канфіскаваныя” дзве лініі па вытворчасці і ўпакоўцы тытунёвых вырабаў, а таксама кампаненты, якія выкарыстоўваюцца ў вытворчасці, сотні тысяч цыгарэт і больш за 1,5 тоны тытуню. Страты дзяржаўнай казны ацэньваюцца больш як у 2,6 млн злотых (больш за 723 тыс. долараў паводле актуальнага курсу Нацбанка Польшчы).
Адзначаецца, што “члены міжнароднай арганізаванай злачыннай групы займаліся незаконнай вытворчасцю і распаўсюдам цыгарэт з лагатыпам папулярнага тытунёвага брэнда” (мяркуючы па распаўсюджаных візуальных матэрыялах, гаворка ідзе пра брэнд Marlboro).
Сёлета ў красавіку ў Польшчы падчас маштабнай аперацыі па выяўленні і ліквідацыі незаконных месцаў вытворчасці, упакоўкі і захоўвання тытунёвых вырабаў было затрымана 11 чалавек, у тым ліку трое грамадзян Беларусі. Тады шкода польскай казне была ацэненая на суму, якая перавышае 9 млн долараў.
