У суд накіраваная справа аб крадзяжы амаль 50 т металалому з прадпрыемства ў Шумілінскім раёне

26 жніўня, Позірк. Справа аб крадзяжы 48 тон металалому былымі дырэктарам і двума бухгалтарамі прадпрыемства ў Шумілінскім раёне (Віцебская вобласць) накіраваная ў суд, паведамляе Генеральная пракуратура са спасылкай на службу інфармацыі пракуратуры Віцебскай вобласці.

Ім інкрымінаваны крадзеж шляхам злоўжывання службовымі паўнамоцтвамі групай асоб паводле папярэдняй змовы (ч. 2 арт. 210 Крымінальнага кодэкса).

Згодна з матэрыяламі справы, цяпер ужо былы дырэктар прадпрыемства са жніўня 2025 года выкарыстаў свае службовыя паўнамоцтвы ў карыслівых мэтах. У прыватнасці, ён выкраў металалом, які належыць райвыканкаму. Кошт выкрадзенага перавысіў 9 тыс. рублёў, злачынны даход, атрыманы фігурантам, склаў 5,3 тыс. рублёў, адзначаецца ў рэлізе.

Акрамя таго, з верасня па лістапад 2025 года былы дырэктар здзейсніў аналагічнае злачынства. Дзейнічаючы па папярэдняй змове з выконваючай абавязкі галоўнага бухгалтара прадпрыемства і бухгалтарам, ён арганізаваў крадзеж 2,5 тыс. рублёў, якія таксама належаць райвыканкаму.

Абраную раней у дачыненні да абвінавачаных меру стрымання ў выглядзе падпіскі аб нявыездзе і належных паводзінах пракурор пры накіраванні справы ў суд не змяніў.

16 сакавіка паведамлялася аб узбуджэнні ў Віцебскай вобласці крымінальнай справы па ч. 3 арт. 210 КК супраць кіраўніка сельгаспрадпрыемства, які ў жніўні і верасні 2025 года выкраў каля 60 тон металу. Шкода, прычыненая прадпрыемству, перавысіла 12 тыс. рублёў.