За мінулы тыдзень зафіксавана не менш як чатыры ўварванні беспілотнікаў у неба Беларусі — СМІ

31 сакавіка, Позірк. За мінулы тыдзень зафіксавана не менш як чатыры ўварванні беспілотных лятучых апаратаў у паветраную прастору Беларусі падчас расійскіх атак па Украіне, паведамляе медыя “Флагшток”, спасылаючыся на даныя ўкраінскага маніторынгавага канала “Рында маніторыць”.

Паведамляецца, што адзін дрон заляцеў у Гомельскі раён (24 сакавіка) тры — у Брагінскі (25 і 29 сакавіка).

Адзначаецца, што “інфармацыі пра выбухі або разбурэнні не паступала”.

23 сакавіка намеснік міністра ўнутраных спраў — камандуючы ўнутранымі войскамі Мікалай Карпенкаў заявіў, што ў Беларусь “вельмі часта” залятаюць БПЛА з тэрыторыі Украіны.

Карпенкаў дэ-факта прызнаў, што беларуская сістэма абароны не спраўляецца з такімі баявымі дронамі. Іх паходжанне ён не назваў.

Да нядаўняга часу расійскую ваенную актыўнасць у Беларусі адсочвала маніторынгавая група “Беларускі Гаюн”. 7 лютага праект быў закрыты яго заснавальнікам Антонам Матолькам — праз некалькі дзён пасля ўцечкі даных.