“Белавія” і расійскі авіяперавозчык Utair падпісалі код-шэрынгавае пагадненне

31 сакавіка, Позірк. Авіякампаніі “Белавія” і Utair (РФ) падпісалі код-шэрынгавае пагадненне, паведамляе беларускі перавозчык.

Адзначаецца, што цяпер пасажыры могуць аформіць агульны квіток на рэйсы гэтых кампаній з Беларусі ў дзесяць расійскіх гарадоў і назад — Грозны, Краснаярск, Махачкалу, Мінеральныя воды, Наябрск, Самару, Сургут, Цюмень, Уфу і Ханты-Мансійск.

У рамках пагаднення рэйсы з Беларусі да стыкоўных аэрапортаў РФ будзе выконваць беларускі бок, далей — расійскі.

Utair — адзін з найбуйнейшых у Расіі авіяхолдынгаў. Выконвае грузапасажырскія і санітарныя рэйсы.

Найбуйнейшы вузлавы аэрапорт авіякампаніі — Унукава (Масква). Базавыя хабы ў расійскіх рэгіёнах — Цюмень, Сургут, Уфа.

Паводле даных авіякампаніі, у флот уваходзіць 59 лайнераў.

Раней паведамлялася, што Нацыянальны аэрапорт Мінск перайшоў на вясенне-летні расклад палётаў.

Паводле даных аэрапорта, авіякампанія “Белавія” з 26 красавіка аднаўляе сезонныя рэйсы ў Махачкалу (два разы на тыдзень), з 29 траўня — у Мурманск (адзін раз у тыдзень).