Беларускія пагранічнікі затрымалі грамадзяніна Літвы з псіхатропамі

1 красавіка, Позірк. Грамадзяніна Літвы, пры якім былі псіхатропы, затрымалі вайскоўцы Смаргонскай пагранічнай групы (Гродзенская вобласць) паблізу беларуска-літоўскай мяжы, заяўляе прэс-служба Дзяржаўнага пагранічнага камітэта.

Гэта адбылося яшчэ 26 лютага, аднак ведамства паведаміла пра затрыманне толькі 1 красавіка.

Мужчына, як сцвярджае Дзяржпагранкамітэт, паведаміў, што “парушыў мяжу з мэтай ухілення ад крымінальнага пераследу ў сваёй краіне”.

“У ходзе агляду асабістых рэчаў затрыманага былі знойдзеныя капсулы з белым парашкападобным рэчывам, а таксама 20 капсул з рэчывам расліннага паходжання, — гаворыцца ў паведамленні. — Згодна з праведзенай экспертызай, канфіскаванае з’яўляецца асабліва небяспечным псіхатропным рэчывам — MDMB (N)-BZ-F агульнай масай больш за 110 грам”.

У дачыненні да літоўскага грамадзяніна распачатыя справы паводле ч. 1 арт. 328 (незаконны абарот наркатычных сродкаў, псіхатропных рэчываў, іх прэкурсораў і аналагаў; санкцыя — арышт, абмежаванне волі на тэрмін да 5 гадоў або пазбаўленне волі на тэрмін ад 2 да 5 гадоў) і ч. 2 арт. 328¹ (незаконнае перамяшчэнне праз мытную граніцу ЕАЭС і (або) дзяржмяжу Беларусі наркатычных сродкаў, псіхатропных рэчываў або іх прэкурсораў або аналагаў; абмежаванне волі на тэрмін да 5 гадоў або пазбаўленне волі на тэрмін ад 5 да 10 гадоў са штрафам або без).

Паводле інфармацыі Дзяржпагранкамітэта, мужчына змешчаны ў ізалятар часовага ўтрымання згаданай пагранічнай групы.