У дачыненні да трох беларускіх дальнабойшчыкаў распачатыя крымінальныя справы за спробы хабару расійскім мытнікам

2 красавіка, Позірк. Тры выпадкі за два дні спроб дачы хабару беларускімі кіроўцамі вялікагрузных аўтамабіляў зафіксавалі супрацоўнікі Пскоўскай мытні (РФ).

Паводле інфармацыі прэс-службы ведамства, інцыдэнты адбыліся 23 і 24 сакавіка ў пункце пропуску “Убылінка” (расійска-латвійская мяжа).

Двойчы дальнабойшчыкі прапаноўвалі хабар за тое, каб супрацоўнікі мытні “не распачыналі справы аб адміністрацыйных правапарушэннях” за парушэнні пры запаўненні разавых дазволаў на праезд па тэрыторыі РФ (200 і 500 долараў), і адзін раз — за “непрыцягненне да адміністрацыйнай адказнасці ў сувязі з выяўленым перавышэннем дапушчальнай нагрузкі на вось транспартнага сродку міжнародных перавозак” (500 долараў).

“За спробы дачы хабару ў дачыненні да хабарадаўцаў, распачатыя крымінальныя справы паводле ч. 3 арт. 30 (замах на злачынства) і ч. 3 арт. 291 КК РФ (дача хабару службовай асобе) і абраная мера стрымання ў выглядзе падпіскі аб нявыездзе. Паводле гэтага артыкула прадугледжана максімальнае пакаранне ў выглядзе пазбаўлення волі на тэрмін да васьмі гадоў”, — адзначылі ў мытні.

23 студзеня непадалёк ад польскай Ломжы (Падляскае ваяводства) 60-гадовы дальнабойшчык з Беларусі спрабаваў даць хабар праваахоўнікам за неафармленне пратаколу за перавышэнне хуткасці, паведамляла прэс-служба мясцовай паліцыі.