З 2014 года праз шэрагі УСУ і добраахвотніцкіх фарміраванняў прайшло больш за тысячу беларускіх грамадзян — АПК

2 красавіка, Позірк. “Паводле папярэдніх ацэнак, з 2014 года праз шэрагі Узброеных cіл Украіны і добраахвотніцкіх фарміраванняў прайшло больш за 1 тыс. беларускіх грамадзян, многія з якіх працягваюць служыць у складзе палка Каліноўскага”, — гаворыцца ў распаўсюджаным 1 красавіка паведамленні Аб’яднанага пераходнага кабінета (АПК) па выніках яго пасяджэння.

Адзначаецца, што на сустрэчы “асобная ўвага была нададзеная ўнёску беларускіх добраахвотнікаў, якія змагаюцца на баку Украіны супраць расійскай агрэсіі”, АПК “выказвае высокую ацэнку іх мужнасці і прынцыповасці”.

Падкрэсліваецца, што “падтрымка гэтых людзей з’яўляецца маральным абавязкам дэмакратычных сіл, а іх дзейнасць набліжае перамогу не толькі Украіны, але і свабоднай Беларусі”.

Кабінет заявіў таксама пра падтрымку міратворчых намаганняў еўрапейскіх дзяржаў, уключаючы ініцыятывы, што прадугледжваюць стварэнне міжнароднага механізму бяспекі ва Украіне, умацаванне ўсходняй мяжы Еўрасаюза і НАТА, забеспячэнне прававой адказнасці за агрэсію і ваенныя злачынствы.

На думку АПК, “менавіта шляхам калектыўных і скаардынаваных дзеянняў еўрапейскія краіны могуць не толькі спыніць расійскую агрэсію, але і прадухіліць паўтарэнне падобных пагроз у будучыні”.

Батальён імя Кастуся Каліноўскага быў створаны 9 сакавіка 2022 года. 26 сакавіка таго ж года ён увайшоў у склад Узброеных сіл Украіны, а 21 мая было абвешчана пра яго трансфармацыю ў полк.

У Беларусі па факце стварэння Палка Кастуся Каліноўскага (ПКК) распачатая крымінальная справа, ён прызнаны “экстрэмісцкім фарміраваннем”, любая дапамога структуры або намер яе аказання, жаданне ўступіць у полк жорстка праследуецца ўладамі.

25 верасня мінулага года стала вядома, што ПКК прызнаны беларускімі ўладамі “тэрарыстычнай арганізацыяй”. У адказ на гэта полк заявіў, што прызнае “тэрарыстычнай арганізацыяй” рэжым Аляксандра Лукашэнкі.

Паводле звестак СМІ, з пачатку поўнамаштабнай вайны ў баях супраць Расіі загінула не менш як 64 беларускіх добраахвотніка.