З пачатку месяца ад наступстваў пажараў памерла сем чалавек

2 красавіка, Позірк. З пачатку красавіка ў Беларусі ад наступстваў пажараў памерла сем чалавек, вынікае са зводак Міністэрства па надзвычайных сітуацыях.

Непасрэдна на пажарах загінулі чатыры чалавекі. Трагедыі адбыліся ў Магілёўскім раёне, Пастаўскім раёне Віцебскай вобласці (двое) і Уздзенскім раёне Мінскай вобласці.

Яшчэ трое памерлі ў бальніцах — у Баранавіцкім раёне Брэсцкай вобласці, Гомельскім і Мінскім раёнах.

Згодна з актуальнымі данымі, з пачатку года ў Беларусі адбылося 2.007 пажараў — на 35,7% больш, чым за аналагічны перыяд 2024-га (1.479). Загінула 219 чалавек (163; 34,4%), траўміравана – 134 (142; -5,6%).

“Позiрк” ужо некалькі разоў звяртаў увагу на тое, што МНС часам карэкціруе ў бок змяншэння статыстыку смяротнасці на пажарах.

У Беларусі фіксуецца “сур’ёзная праблематычная сітуацыя” з гібеллю людзей на пажарах, заявіў на прэс-канферэнцыі 4 сакавіка ў Мінску памочнік міністра па надзвычайных сітуацыях, прэс-сакратар МНС Яўген Бараноўскі.

“Вельмі сур’ёзны рост, такі непрыемны рост [колькасці загінуўшых]”, — сказаў ён.

Асноўная прычына, па якой павялічваецца колькасць пажараў, — неасцярожнае абыходжанне з агнём, у першую чаргу звязанае з курэннем у стане алкагольнага ап’янення, адзначыў прадстаўнік МНС.