У асобных раёнах Беларусі 2 красавіка чакаецца моцны вецер — МНС

2 красавіка, Позірк. Пра ўзмацненне ветру ў Беларусі 2 красавіка папярэджвае Міністэрства па надзвычайных сітуацыях.

Паводле інфармацыі ведамства, чакаецца паўночны, паўночна-ўсходні вецер хуткасцю 5–10 метраў на секунду, удзень — парывы ​​да 14 м/с, у асобных раёнах — 15–18 м/с.

Шкала Бофарта класіфікуе вецер хуткасцю 4–5 м/c і 6–7 м/c як слабы і ўмераны адпаведна (3 і 4 балы з 12), 8–10 і 11–13 м/c — свежы і моцны (5 і 6 балаў), 14–17, 18–20 м/с — дужы і вельмі дужы (7 і 8 балаў).

Умовы надвор’я, адзначае МНС, могуць прывесці да пашкоджання (абрыву) ліній сувязі і электраперадачы, парушэння электразабеспячэння, адключэння электрычных падстанцый, электраэнергіі ў населеных пунктах; пашкоджання (абвальвання) слаба ўмацаваных канструкцый, дахаў будынкаў, збудаванняў; падзення дрэў.

У цэлым па краіне прагназуецца пераменная воблачнасць, пераважна без ападкаў. Тэмпература паветра днём складзе 12–17 градусаў цяпла (у паўднёва-ўсходняй частцы краіны — 9–11 градусаў, дажджы).