Лукашэнка назваў Беларусь і РФ “агульнай айчынай” для жыхароў дзвюх краін
Лукашэнка і Пуцін на палях саміта ШАС у Астане (3 ліпеня 2024 года)
2 красавіка, Позірк. Мінск і Масква “разам будуюць будучыню”, абапіраючыся на “ўзаемны давер і падтрымку”, адзначыў Аляксандр Лукашэнка 2 красавіка ў віншаванні з Днём яднання народаў Беларусі і Расіі.
Гэты дзень ён лічыць “знакавай для беларусаў і расіян датай”, якая стала “сімвалам сапраўднага братэрства, змацаванага сумесным гістарычным мінулым, культурнай і духоўнай еднасцю, шматлікімі роднаснымі і сямейнымі сувязямі”.
“Нас звязваюць шматгадовыя традыцыі сяброўства і ўзаемавыручкі, якія ўвабралі ў сябе веліч агульных перамог, цяжар цяжкіх выпрабаванняў, горыч неймаверных страт і радасць стварэння”, — прыводзіць тэкст паслання прэс-служба віншавальніка.
Рэалізацыя “маштабных саюзных праграм, кааперацыя ў сферах эканомікі, навукі і тэхналогій”, сцвярджае Лукашэнка, адкрываюць для партнёрства Беларусі і РФ “новыя, практычна бязмежныя гарызонты магчымасцей”.
На яго думку, “поспехі ў атамнай энергетыцы, касмічных даследаваннях, машынабудаванні і мікраэлектроніцы” сталі “важнымі прыступкамі на шляху да дасягнення тэхналагічнага суверэнітэту і імпартанезалежнасці”.
Назваўшы прыярытэтам беларуска-расійскай інтэграцыі “дабрабыт людзей”, ён заявіў, што яго “непарушнай асновай” застаюцца “роўныя правы, сацыяльныя гарантыі, свабода выбару і доступ да якасных паслуг у медыцыне, адукацыі, пенсійным забеспячэнні”.
“Агульная адукацыйная, інфармацыйная, культурная прастора дазваляе кожнаму грамадзяніну Беларусі і Расіі адчуваць сябе часткай вялікай цэлай — нашай агульнай Айчыны”, — сцвярджае віншавальнік.
У пасланні прэзідэнту РФ Уладзіміру Пуціну Лукашэнка адзначыў, што “інтэграцыйны праект <…> садзейнічаў набыццю бясцэннага досведу ў розных сферах дзяржаўнага будаўніцтва, раскрыццю вялізнага стваральнага патэнцыялу беларускай і расійскай эканомік, фарміраванню інструментаў, якія даюць магчымасць сумесна вырашаць шырокі спектр задач любой складанасці”.
На яго думку, “надзейнай абаронай ад знешніх пагроз” сталі “паслядоўныя крокі ў гарантаванні бяспекі, роўных правоў грамадзян, паступальнае нарошчванне гандлёва-эканамічнай і інвестыцыйнай супрацы”.
Лукашэнка таксама накіраваў віншаванні кіраўніку ўрада і спікерам абедзвюх палат парламента РФ, прадстаяцелю Рускай праваслаўнай царквы, якая лічыць Беларусь сваёй кананічнай тэрыторыяй.
2 красавіка 1996 года першы прэзідэнт РФ Барыс Ельцын і Аляксандр Лукашэнка падпісалі дагавор аб стварэнні супольнасці Беларусі і Расіі, а 2 красавіка 1997-га — дагавор аб Саюзе Беларусі і Расіі. 23 траўня 1997 года быў прыняты статут саюза. 8 снежня 1999 года падпісаны дагавор аб стварэнні Саюзнай дзяржавы, які набыў моц 26 студзеня 2000 года.
Расія пачала фарсіраваць тэму інтэграцыі з Беларуссю ў снежні 2018 года. Дзмітрый Мядзведзеў, які на той момант займаў пасаду прэм’ер-міністра РФ, фактычна ўвязаў максімальнае збліжэнне дзвюх краін з далейшай падтрымкай Мінска з боку Масквы.
Працэс актывізаваўся пасля таго, як Расія падтрымала Лукашэнку на хвалі поствыбарных пратэстаў 2020 года, а таксама пасля пачатку поўнамаштабнай вайны РФ супраць Украіны ў лютым 2022-га, у якой афіцыйны Мінск падтрымлівае Крэмль.
На пасяджэнні Вышэйшага дзяржсавета Саюзнай дзяржавы ў лістападзе 2021 года Лукашэнка і Пуцін падпісалі дэкрэт, якім зацвердзілі 28 саюзных праграм інтэграцыі. На сумеснай прэс-канферэнцыі 13 сакавіка 2025-га ў Маскве расійскі лідар паведаміў, што “ўсе 28 праграм, якія былі намечаныя, выкананыя на 100%”.
Падчас выступу 14 сакавіка Лукашэнка ў Савеце Федэрацыі РФ Лукашэнка выказаўся супраць найхутчэйшага зліцця дзвюх краін: “Калі Расія ўвойдзе ў склад Беларусі ці, наадварот, Беларусь увойдзе ў склад Расіі? Рабяты, гэта наўрад ці будзе ў бліжэйшы час. Калі мы будзем у гэтым плане біцца ў гэтыя адчыненыя дзверы, мы загубім усё, што мы зрабілі. Трэба ісці спакойна, step by step, крок за крокам, нешта рэалізоўваючы, як мы”.
Паводле слоў спікера, у цяперашняй сітуацыі “з устаноўкамі, як у Савецкім Саюзе, падыходзіць нельга”, гэты “момант упушчаны”. Разам з тым, адзначыў Лукашэнка, “геапалітычная сітуацыя складваецца так”, што ён дамовіўся з Пуціным абараняць іх “агульную айчыну”.
“Айчына ў нас агульная. Але так сталася. Мы з вамі многія былі сведкамі. На гэтай агульнай айчыне ўтварылася паўтара дзясятка самастойных дзяржаў. Ведаеце пра прычыны, як гэта адбывалася ды іншае. І Беларусь заўсёды называлі самай савецкай рэспублікай”, — сказаў ён.
Ва ўмовах санкцый РФ і Беларусі карысней не аб'ядноўвацца, а "мець дзве розныя дзяржавы" — расійскі дэпутат
15 сакавіка, Позірк. Які б ні быў "дзяржаўны статус" інтэграцыі Беларусі і Расіі, народы дзвюх краін "павінны заставацца братамі навекі", заявіў расійскаму медыя "Ридус" намеснік старшыні камітэта Дзяржаўнай Думы РФ па міжнародных справах Аляксей Чэпа. Такім чынам парламентарый пракаментаваў выступ Аляксандра Лукашэнкі …
Беларусь і РФ узгодняць метадычныя рэкамендацыі па ўдзеле грамадзян дзвюх краін у мясцовых выбарах
1 красавіка, Позірк. Цэнтральнай выбарчай камісіі Расіі належыць узгадніць з ЦВК Беларусі і асобнымі органамі ўлады РФ "метадычныя рэкамендацыі па ўдзеле замежных грамадзян у мясцовых выбарах", паведамляе ТАСС са спасылкай на адказную за выбары федэральную структуру. Адзначаецца, што "для распрацоўкі гэтых рэкамендацый …