Прадстаўнікі Узброеных сіл Беларусі інспектуюць “вызначаны раён” Сербіі
3 красавіка, Позірк. Прадстаўнікі Узброеных сіл Беларусі 2–3 красавіка праводзяць “інспекцыю вызначанага раёна” на тэрыторыі Сербіі, паведаміў памочнік міністра абароны па пытаннях міжнароднай вайсковай супрацы (МВС), начальнік дэпартамента МВС Валерый Равенка.
Інспекцыя праходзіць у рамках Венскага дакумента 2011 года аб мерах умацавання даверу і бяспекі.
“Сербія, як і Беларусь, адданая выкананню сваіх абавязацельстваў у сферы кантролю над узбраеннямі”, — напісаў Равенка на сваёй старонцы ў сацыяльнай сетцы Х.
Варта адзначыць, што ў чэрвені 2024 года ў Беларусі ўпершыню за чатыры гады прайшла інспекцыя ў рамках згаданага дакумента. Правялі яе менавіта вайскоўцы Сербіі. Тады замежны кантынгент цікавіла 38-я асобная дэсантна-штурмавая брыгада (дыслакаваная ў Брэсце).
Сербія з’яўляецца кандыдатам на ўступленне ў Еўрасаюз. У 2021 годзе Бялград далучыўся да санкцый ЕС супраць Мінска, пасля расійскага ўварвання ва Украіну падтрымаў наступныя пакеты абмежаванняў. Напрыканцы студзеня 2022 года беларускі ўрад распаўсюдзіў на Сербію прадуктовае эмбарга, уведзенае ў адказ на санкцыі. Пры гэтым Сербія 25 кастрычніка 2019 года падпісала пагадненне аб зоне свабоднага гандлю з Еўразійскім эканамічным саюзам, у які ўваходзіць Беларусь. Дакумент набыў моц 10 ліпеня 2021 года.
Апошнім часам Мінск і Бялград дэманструюць узаемнае жаданне наладзіць стасункі.
Сербскі прэзідэнт Аляксандр Вучыч быў першым сярод кіраўнікоў еўрапейскіх дзяржаў, якія павіншавалі Лукашэнку з “перамогай на выбарах” 26 студзеня 2025 года. Ён зрабіў гэта двума днямі пазней.
20 сакавіка ў сталіцы Сербіі адбыўся чарговы раунд кансультацый знешнепалітычных ведамстваў дзвюх краін, падчас якога абмяркоўвалася “развіццё палітычнага дыялогу і гандлёва-эканамічнай супрацы, пашырэнне дагаворна-прававой базы, узаемадзеянне Мінска і Бялграда на міжнародных пляцоўках, а таксама ў гуманітарнай сферы”.
Беларусь з’яўляецца бокам Венскага дакумента 2011 года, які сярод іншага прадпісвае дзяржавам — членам Арганізацыі па бяспецы і супрацы ў Еўропе “абменьвацца інфармацыяй пра ўзброеныя сілы, сістэмы ўзбраенняў і тэхнікі, планаванне ў галіне абароны і вайсковыя выдаткі”, а таксама дазваляе інспектаваць вайсковыя адзінкі “для ацэнкі правільнасці пададзенай пра іх інфармацыі”.
Пасля прэзідэнцкіх выбараў у 2020 годзе кантакты Беларусі з краінамі Захаду па лініі Венскага дакумента звяліся да мінімуму, а ў 2022-м фактычна спыніліся пасля падтрыманага Мінскам уварвання Расіі ва Украіну.