Варшава пераглядзіць правілы выдачы “карты паляка”
3 красавіка, Позірк. Польшча пераглядзіць палажэнні закона аб “карце паляка” ад 7 верасня 2007 года, каб ліквідаваць “выпадкі злоўжывання”, звязаныя, у прыватнасці, з “выкарыстаннем заяўнікамі падробленых дакументаў, што пацвярджаюць польскае паходжанне”. Гэта прадугледжана стратэгіяй супрацы з польскай дыяспарай і палякамі за мяжой да 2030 года, прынятай урадам краіны.
“Паколькі ў апошнія гады “карта паляка” ў значнай ступені садзейнічала легальнай міграцыі ў Польшчу, змяненні павінны ўключаць, у прыватнасці, скасаванне палажэнняў аб крытэрыі актыўнасці ў польскіх грамадскіх арганізацыях на карысць ведання польскай мовы і польскай культуры”, — адзначаецца ў дакуменце. Прапануецца “пастрожыць сістэму выдачы вышэйзгаданых дакументаў”.
Акрамя гэтага стратэгія прадугледжвае правядзенне аналізу “аб’ёму і парадку надання падтрымкі, адрасаванай уладальнікам “карты паляка”, што пражываюць у Рэспубліцы Польшча”.
Летась у снежні выданне Rzeczpospolita паведамляла пра запланаванае пастрожанне правіл выдачы “карт паляка” і прыводзіла статыстыку іх выдачы (без разбіўкі па краінах). За няпоўны 2024 год больш за 9,2 тыс. са звыш 15 тыс. дакументаў выдалі польскія консульствы.
Са спасылкай на інфармацыю МЗС Польшчы, медыя паведамляла, што ад пачатку дзеяння закона аб выдачы “карт паляка” (прыняты ў верасні 2007 года) і да 15 кастрычніка 2024 года анулявана 1.830 такіх дакументаў.
Удакладнялася, што ў чатырох чалавек статус ануляваны за “паводзіны, якія дыскрэдытуюць Польшчу або палякаў”, у 157 — за выкарыстанне фальшывых дакументаў або “з прычыны бяспекі, дзеянняў на шкоду суверэнітэту Польшчы або ўдзелу ў парушэннях правоў чалавека”, яшчэ 145 замежнікаў адмовіліся ад карты, а ў 1.524 выпадках была выдадзеная новая “карта паляка” са змененымі звесткамі.
Акрамя таго, 7.310 картак анулявана ў сувязі з атрыманнем іх уладальнікамі польскага грамадзянства або дазволу на сталае пражыванне.
Летась у кастрычніку пастрожанне правіл атрымання “карты паляка” анансавалася ў рамках новай міграцыйнай стратэгіі Варшавы, прапанаванай прэм’ер-міністрам Дональдам Тускам.
18 студзеня мінулага года ў эфіры праграмы “Маркаў. Нічога асабістага” на тэлеканале АНТ начальнік дэпартамента па грамадзянстве і міграцыі МУС Аляксей Бягун заявіў, што ў Беларусі праводзіцца “комплекс мерапрыемстваў”, каб “пераканаць грамадзян, што “карта паляка” наносіць шкоду, у тым ліку нацыянальнай бяспецы Беларусі, і выкарыстоўваць яе на тэрыторыі Беларусі, і атрымліваць “карту паляка” недапушчальна”.
Паводле яго сцвярджэння, “толькі за паўгода” 2023-га зафіксавана “больш за 100 выпадкаў, калі грамадзяне публічна звярнуліся” да МУС, “каб адмовіцца ад “карты паляка”.
11 ліпеня 2023 года пачалі дзейнічаць змены ў закон “Аб грамадзянстве Рэспублікі Беларусь”, якія сярод іншага сярод іншага абавязваюць грамадзян на працягу трох месяцаў пасля атрымання замежнага грамадзянства, дазволу на жыхарства, іншых дакументаў, якія даюць дадатковыя правы на тэрыторыі іншых краін (у тым ліку “карты паляка”), паведамляць пра гэта кампетэнтным органам.