Пацярпелымі па справах службовых асоб Польшчы, Літвы і Латвіі прызнаныя 342 мігранты, у тым ліку 55 загінулых — СК

3 красавіка, Позірк. У рамках трох крымінальных спраў, узбуджаных у Беларусі па факце “незаконных дзеянняў у дачыненні да мігрантаў”, пацярпелымі прызнаныя 342 мігранты, у тым ліку 55 загінулых, вынікае з інтэрв’ю намесніка начальніка ўпраўлення па расследаванні злачынстваў супраць асобы і грамадскай бяспекі галоўнага следчага ўпраўлення СК Аляксандра Рудзько дзяржаўнаму агенцтву БелТА.

Прадстаўнік ведамства нагадаў, што ў рамках гэтых спраў расследаванне ў дачыненні да службовых асоб Польшчы вядзецца з 2021 года, Літвы і Латвіі — з 2023-га.

Пацярпелымі па справе ў дачыненні да польскіх асоб з’яўляюцца 223 чалавекі (18 загінулых), латвійскіх — 83 (25), літоўскіх — 36 (12), паведаміў Рудзько.

“Паказанні пацярпелых сведчаць пра тое, што ў сумежных дзяржавах сфармаваныя фільтрацыйныя пункты, — сцвярджае прадстаўнік СК. — Маюцца канкрэтныя эпізоды, калі людзі праз іх праходзілі. У гэтых фільтрацыйных пунктах людзей збівалі, катавалі, адымалі грошы і тэлефоны. І людзі, якія прайшлі праз гэтыя фільтрацыйныя пункты, паказваюць на прыналежнасць службовых асоб да пэўных структур і спецслужбаў”.

Кажучы пра рэакцыю заходніх краін на заявы Беларусі пра жорсткае абыходжанне з мігрантамі, ён паведаміў, што “на базе цэнтральнага апарата Следчага камітэта праходзіла сустрэча са спецдакладчыкам ААН па правах чалавека”, якому былі прадастаўленыя “матэрыялы крымінальнай справы, доказная база”. “Усё гэта ён атрымаў на рукі. Але якой-небудзь рэакцыі ад ААН не было”, — заявіў Рудзько.

Паводле яго слоў, супраца з сумежнымі краінамі па гэтай тэме “фактычна зведзеная да нулю”: “Там проста ігнаруюць любыя просьбы пра прававую дапамогу”.

21 чэрвеня 2024 года старшыня СК Дзмітрый Гара паведаміў, што СК расследуе крымінальныя справы ў дачыненні да службовых асоб Польшчы, Літвы і Латвіі па факце здзяйснення 52 злачынстваў. Паводле яго слоў, пацярпелымі на той момант выступала “больш за 200 грамадзян замежных дзяржаў, што рухаліся транзітам праз Беларусь у краіны Еўрапейскага саюза, з якіх больш за 50 чалавек загінулі”, астатнія “атрымалі цялесныя пашкоджанні рознай ступені цяжкасці, у тым ліку жанчыны, дзеці”.

28 чэрвеня 2023 года Генпракуратура заявіла, што ў дачыненні да “літоўскага боку” распачатая справа паводле арт. 128 КК (злачынствы супраць бяспекі чалавецтва). У лістападзе таго ж года СК адкрыў справу паводле таго ж артыкула ў дачыненні да неназваных афіцыйных асоб Латвіі.

З пачатку года, паводле падлікаў “Позірку”, Польшча спыніла каля 3,9 тыс. спробаў незаконнага перасячэння мяжы з беларускай тэрыторыі, Латвія — 360, Літва — 220.

Міграцыйны крызіс на мяжы Беларусі і краін Еўрасаюза цягнецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.

Аляксандр Лукашэнка неаднаразова заяўляў, што беларускія пагранічнікі не будуць спыняць нелегальных мігрантаў, якія накіроўваюцца ў Еўрасаюз праз Беларусь, таму што іх туды “паклікалі”.