На палітзняволеную Кульшу, якая мусіла выйсці на волю ў красавіку, завялі новую справу

3 красавіка, Позірк. У дачыненні да палітзняволенай Вікторыі Кульшы распачалі новую — ужо чацвёртую — справу паводле арт. 411 КК (злоснае непадпарадкаванне патрабаванням адміністрацыі папраўчай установы, якая выконвае пакаранне ў выглядзе пазбаўлення волі), паведамляе праваабарончая ініцыятыва Dissidentby.

Паводле інфармацыі праваабаронцаў, тэрмін зняволення жанчыны заканчваецца 6 красавіка. Аднак на пачатку гэтага тыдня яе перавялі з калоніі № 24 (знаходзіцца ў гарадскім пасёлку Зарэчча ў Рэчыцкім раёне Гомельскай вобласці) у гомельскі следчы ізалятар № 3.

Кульша знаходзіцца ў няволі з 4 лістапада 2020 года. Па выніках некалькіх судоў прыгавораная да 4,5 года зняволення паводле арт. 342 (арганізацыя і падрыхтоўка дзеянняў, што груба парушаюць грамадскі парадак, або актыўны ўдзел у іх) і 411 КК.

Да затрымання палітзняволеная працавала інжынерам па ахове працы. Паводле адукацыі яна юрыст, таксама скончыла курсы па манікюры і масажы. Згодна са звесткамі праваабарончага цэнтра “Вясна”, была адміністратарам чата “Водители 97%” (“Кіроўцы 97%”), які заклікаў кіроўцаў перакрываць вуліцы на знак пратэсту пасля выбараў 2020 года.

Пра дрэнны стан здароўя Вікторыі Кульшы паведаміла на прэс-канферэнцыі 10 лютага ў Вільнюсе экс-палітзняволеная Паліна Шарэнда-Панасюк.

“Вікторыя Кульша — чалавек, перад якім я схіляюся. Яна не здаецца, нягледзячы на тое, што ў яе ўжо вельмі цяжкі стан здароўя. Яна трымала галадоўкі месяцамі. Чалавек адмаўляўся ад ежы, яго кідалі ў ШЫЗА (штрафны ізалятар. — “Позірк“.). У ШЫЗА яна працягвала галадоўку. Каб вы разумелі, у ШЫЗА ты [у рэжыме] нонстоп знаходзішся проста ва ўмовах, якія можна параўнаць з падваламі НКУС. У такіх умовах яна трымала галадоўку. Гэты чалавек казаў: “Я пайду да канца, я не здамся”. Гэтая катавальня і яе супрацьстаянне гэтаму тэрору працягваецца чатыры гады. У чалавека ўжо адмовілі ныркі, нейкія іншыя захворванні. Яна працягвае ў такім стане трымацца”.

Шарэнда-Панасюк заклікала да таго, каб тэма Кульшы “не знікала са старонак незалежных СМІ, парадку дня дыпламатаў і дэпутатаў Еўрасаюза”. “Я ведаю, што былі смерці ў мужчынскіх калоніях. Вікторыя Кульша рэальна можа стаць першай жанчынай, якая памрэ ва ўмовах гэтага лукашэнкаўскага ГУЛАГу”, — падкрэсліла яна.

Незалежныя эксперты ААН па правах чалавека 26 сакавіка выступілі з заявай, у якой заклікалі беларускія ўлады адрэагаваць на пастаянныя абвінавачанні ў жорсткім абыходжанні з жанчынамі ў калоніях. Дакумент размешчаны на сайце Савета ААН па правах чалавека.

“Мы глыбока занепакоеныя суровым абыходжаннем з жанчынамі, асуджанымі ў сувязі з пратэстамі супраць прэзідэнцкіх выбараў 2020 года”, — заявілі эксперты.

Яны выказалі асаблівую трывогу наконт пагрозлівага жыцця стану Кульшы, адзначыўшы, што яе фізічнае і псіхічнае здароўе сур’ёзна пагоршылася. Пры гэтым, як заяўлялася, ёй адмоўлена ў адэкватнай медыцынскай і псіхалагічнай дапамозе, і яна працягвае зазнаваць жорсткае абыходжанне.